पुणे : मोटारीची काच फोडून पाच लाखांची रोकड चोरून नेण्यात आल्याची घटना पर्वती भागातील मित्र मंडळ चौकात घडली. याप्रकरणी चोरट्यांविरुद्ध पर्वती पोलिसांनी गु्न्हा दाखल केला. मार्केट यार्ड भागात दुचाकीची डिकी उचकटून चोरट्यांनी एक लाखांची रोकड चोरून नेल्याचा प्रकार उघडकीस आला.
याबाबत एका व्यावसायिक तरुणाने पर्वती पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार तरुण मार्केट यार्डात भागात राहायला आहे. तक्रारदार तरुणाच्या कुटुंबीयांचा व्यवसाय आहे. व्यवसायासाठी लागणारी रोकड काढण्यासाठी तरुण मोटारीतून एका बँकेत गेला होता. तेथून रोकड काढून तो शुक्रवारी (४ एप्रिल) मित्र मंडळ चौकात आला. मित्र मंडळ चौक परिसरात त्याने मोटार लावली होती. दुपारी साडेचारच्या सुमारास चोरट्यांनी मोटारीची काच फोडून खोक्यात ठेवलेली पाच लाख रुपयांची रोकड चोरुन नेली. पोलीस कर्मचारी मरगजे तपास करत आहेत.
दुचाकीची डिकी उचकटून रोकड चोरी
मार्केट यार्ड भागात दुचाकीची डिकी उचकटून चोरट्यांनी एक लाख रुपयांची रोकड चोरु नेल्याची घटना मार्केट यार्ड भागात घडली. याबाबत एका तरुणाने मार्केट यार्ड पोलीस ठाण्यात फिर्याद दिली आहे. तक्रारदार तरुण कात्रज भागातील दत्तनगर परिसरात राहायला आहे. तरुण शुक्रवारी दुपारी एकच्या सुमारास मार्केट यार्ड परिसरात कामानिमित्त आला होता. सातारा रस्त्यावरील उत्सव हाॅटेल परिसरात त्याने दुचाकी लावली होती. चोरट्याने डिकी उचकटून एक लाख रुपयांची रोकड चोरुन नेली. पोलीस कर्मचारी झेंडे तपास करत आहेत.
सदाशिव पेठेत तरुणाचा मोबाइल हिसकावला
भरदिवसा पादचारी तरुणाचा एक लाख रुपयांचा मोबाइल संच चोरट्यांनी हिसकावून नेल्याची घटना सदाशिव पेठेत घडली. याप्रकरणी चाेरट्यांविरुद्ध गुन्हा दाखल करण्यात आला आहे.. याबाबत एका तरुणाने खडक पोलीस ठाण्यात फिर्याद दिली आहे. त्याने दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, पादचारी तरुण बुधवारी (२ एप्रिल) दुपारी अडीचच्या सुमारास सदाशिव पेठेतील उद्यानप्रसाद मंगल कार्यालयाजवळून दुपारी अडीचच्या सुमारास निघाला होता. त्या वेळी दुचाकीस्वार चोरट्यांनी तरुणाच्या हातातील एक लाख रुपयांचा मोबाइल संच हिसकावून नेला. तरुणाने आरडाओरडा केला. चोरटे भरधाव वेगात दुचाकीवरुन पसार झाले. पसार झालेल्या चोरट्यांंचा माग काढण्यात येत असून, सहायक पोलीस निरीक्षक अनिल सुरवसे तपास करत आहेत. नाना पेठेत पादचारी ज्येष्ठ नागरिकाचा मोबाइल संच हिसकावून नेल्याची घटना नुकतीच घडली होती.