मेट्रोचे अडीच लाख रुपयांचे बांधकाम साहित्य चोरीला, शिवाजीनगर पोलीस ठाण्यात गुन्हा दाखल

पुणे : शिवाजीनगर भागात सुरू असलेल्या मेट्रो मार्गिकेचे २ लाख ६० हजार रुपयांचे बांधकाम साहित्य चोरून नेण्यात आल्याची घटना उघडकीस आली आहे. याप्रकरणी शिवाजीनगर पोलीस ठाण्यात गुन्हा दाखल करण्यात आला असून आरोपींचा शोध घेण्यात येत आहे. याबाबत रितेश प्रधान (वय २३, रा. जगताप नगर, थेरगाव) यांनी फिर्याद दिली आहे. फिर्यादी प्रधान हे मेट्रो कंपनीत सिक्युरिटी सुपरवाइजर म्हणून काम करतात. सध्या पुणे मेट्रोचे काम प्रगतीपथावर आहे. शिवाजीनगर ते हिंजवडी मेट्रो मार्गाचे काम सुरू असताना चोरट्यांनी कामगार पुतळा भागातून अडीच लाख रुपये किमतीचे बांधकाम साहित्य चोरून नेले. ऑगस्ट ते नोव्हेंबर २०२४ दरम्यान हा प्रकार घडला. त्यानुसार शिवाजीनगर पोलिसांनी गुन्हा दाखल केला असून सहायक निरीक्षक राजकुमार केंद्रे पुढील तपास करीत आहेत.