हिंदू राष्ट्र सेनेच्या धनंजय देसाईचा जामीन फेटाळला; जाणून घ्या काय आहे प्रकरण?

पुणे : मुळशीत जमीन बळका‌वण्यासाठी एका शेतकऱ्याला बेदम मारहाण केल्याप्रकरणी अटकेत असलेल्या हिंदू राष्ट्र सेनेचा प्रमुख धनंजय देसाई याचा जामीन अर्ज जिल्हा आणि सत्र न्यायाधीश व्ही. डी. निंबाळकर यांनी फेटाळून लावला. मुळशीतील दारवली गावातील शेतकरी प्रदीप शिवाजी बलकवडे (वय ३५) यांची जमीन बळकावण्यासाठी हिंदू राष्ट्र सेनेचा धनंजय देसाई आणि साथीदारांनी १ ऑगस्ट रोजी बेदम मारहाण केल्याची घटना घडली होती. याबाबत बलकवडे यांनी पौड पोलीस ठाण्यात फिर्याद दिली होती. देसाई याने जामीन मिळवण्यासाठी न्यायालयात अर्ज केला होता. सरकारी वकील ॲड. विलास घोगरे पाटील, बलकवडे यांचे वकील ॲड. अमेय बलकवडे, ॲड. सतीश कांबळे, ॲड. सूरज शिंदे, ॲड. ऋषीकेश कडू यांनी देसाई याच्या जामीन अर्जास विरोध केला होता.