पुणे : देशी बनावटीचे पिस्तूल बाळगणाऱ्या सराइताला गुन्हे शाखेच्या दरोडा आणि वाहन चोरी विरोधी पथकाने अटक केली. कात्रज बाह्यवळण मार्गावर ही कारवाई करण्यात आली. त्याच्याकडून पिस्तूल आणि एक काडतूस जप्त करण्यात आले.
केशव अशोक राठोड (वय २५, रा. चरवड वस्ती, वडगाव बुद्रुक) असे अटक करण्यात आलेल्याचे नाव आहे. कात्रज बाह्य‌ळण मार्गावर स्वामी नारायण मंदिराजवळ राठोड थांबला होता. त्याच्याकडे देशी बनावटीचे पिस्तूल असल्याची माहिती तपास पथकाला मिळाली. त्यानंतर पोलिसांच्या पथकाने सापळा लावून त्याला पकडले. त्याच्याकडून पिस्तूल आणि काडतूस जप्त करण्यात आले. वरिष्ठ पोलीस निरीक्षक नंदकुमार बिडवई यांच्या मार्गदर्शनाखाली सहायक निरीक्षक प्रवीण काळुखे, उपनिरीक्षक शाहिद शेख, दत्तात्रय पवार, गणेश ढगे, बाळू गायकवाड, धनंजय ताजणे यांनी ही कारवाई केली.
हेही वाचा…पिंपरी : अपहरण, मारहाण प्रकरणी भाजपच्या माजी नगरसेविकेचा पती, माजी स्वीकृत सदस्यासह ११ जणांवर गुन्हा
ब
तडीपार गुंड अटकेत
विधानसभा निवडणुकीच्या पार्श्वभूमीवर दरोडा आणि वाहन चोरी विरोधी पथक वारजे भागात गस्त घालत होते. शहरातून तडीपार करण्यात आलेला गुंड पियूष उर्फ कान्हा सतीश जाधव (वय २०, रा. वारजे जकात नाका) आदेशाचा भंग करुन वारजे भागात आल्याची माहिती पोलीस कर्मचारी साईकुमार कारके यांना मिळाली. पोलिसांच्या पथकाने त्याला पकडले. त्याच्याविरुद्ध वारजे पोलीस ठाण्यात गुन्हा दाखल करण्यात आला आहे.
बेकायदा सावकरी प्रकरणात एक गजाआड
बेकायदा सावकारी आणि खंडणीच्या गु्न्ह्यात फरार झालेल्या एकाला अटक करण्यात आली. नाविद मुक्तार शेख (वय ३३, रा. कासेवाडी, भवानी पेठ) असे अटक करण्यात आलेल्याचे नाव आहे. शेख याच्याविरुद्ध खडक पोलीस ठाण्यात गुन्हा दाखल झाला होता. त्यानंतर तो पसार झाला होता. तो वारजे भागात येणार असल्याची माहिती पोलीस कर्मचारी रवींद्र गायकवाड यांना मिळाली. त्यानंतर पोलिसांच्या पथकाने सापळा लावून त्याला पकडले.
