गुढी पाडव्याला आंबा खरेदीकडे पाठ, दर तेजीत असल्याने मागणी कमी

एक डझन हापूसचे दर ८०० ते १५०० रुपयांपर्यंत राहिले. गेल्या वर्षी गुढी पाडव्याला हापूसचे दर ५०० ते ७०० रुपयांपर्यंत होते. ‘आंबा महाग झाल्याने गुढी पाडव्याला फारशी मागणी नव्हती. आंबा खरेदीकडे ग्राहकांनी पाठ फिरवली,’ अशी माहिती श्री छत्रपती शिवाजी मार्केट यार्डातील आंबा व्यापारी करण जाधव यांनी दिली.

मार्च महिन्यात आंब्यांची आवक वाढते. साधारणपणे कोकणातून दररोज चार ते पाच हजार पेट्यांची आवक मार्केट यार्डातील फळबाजारात होते. सध्या बाजारात दररोज एक ते दोन हजार पेटी आंब्यांची आवक होत आहे. नेहमीच्या तुलनेत बाजारात आंब्यांची आवक कमी होत आहे. यंदाच्या हंगामात आंब्याचे दर तेजीत राहणार आहेत.