पुणे : साडेतीन मुहूर्तापैकी एक असलेल्या गुढी पाडव्याला आंब्यांना मागणी वाढते. यंदा वातावरणातील बदलांमुळे आंबा लागवड कमी प्रमाणावर झाली असून, नेहमीच्या तुलनेत बाजारात आंब्यांची आवक कमी होत आहे. त्यामुळे दर चढे असून, डझनाचे हापूसचे दर ८०० ते १५०० रुपयांपर्यंत आहेत. गेल्या वर्षी गुढी पाडव्याला हापूसचे दर ५०० ते ७०० रुपयांपर्यंत होते.
गुढी पाडव्याला आंब्यांची खरेदीही मोठ्या प्रमाणावर होते. यंदा आंब्यांची आवक अतिशय कमी प्रमाणावर झाली आहे. नोव्हेंबर, डिसेंबर महिन्यात कोकणात अपेक्षित थंडी पडली नाही. त्यामुळे मोहोर गळून पडल्याने आंबा लागवडीवर परिणाम झाल्याची माहिती श्री छत्रपती शिवाजी मार्केट यार्डातील आंबा व्यापारी युवराज काची आणि अरविंद मोरे यांनी दिली.
मार्च महिन्यात आंब्यांची आवक वाढते. साधारणपणे कोकणातून दररोज चार ते पाच हजार पेट्यांची आवक मार्केट यार्डातील फळबाजारात होते. सध्या बाजारात दररोज एक ते दोन हजार पेटी आंब्यांची आवक होत आहे. गुढी पाडव्यामुळे आंब्यांना मागणी राहणार आहे. सध्या कच्च्या आंब्याच्या चार ते आठ डझनाच्या पेटीला प्रतवारीनुसार २५०० ते सहा हजार रुपये दर मिळाले आहेत, असे त्यांनी सांगितले.
आंबा हंगामाची लवकर अखेर
यंदा आंब्यांची आवक कमी प्रमाणावर होत आहे. १० एप्रिल ते १० मे या कालावधीत आंब्याची आवक वाढणार आहे. पुढील महिन्यात आंब्यांच्या दरात घट होण्याची शक्यता आहे. दरवर्षी हापूसचा हंगाम जून महिन्याच्या पहिल्या आठवड्यापर्यंत सुरू असतो. यंदा पहिल्या बहरातील आंब्याच्या लागवडीवर परिणाम झाला आहे. त्यामुळे आंब्याचा हंगाम लवकर संपण्याची शक्यता असल्याचे आंबा व्यापारी युवराज काची आणि अरविंद मोरे यांनी सांगितले.