पुणे: पोलिसांकडून सीसीटीव्ही चित्रीकरण ताब्यात, मेट्रो स्थानकावर प्रवाशाचा मृत्यू

मनोज कुमार (वय ४०) असे मृत्युमुखी पडलेल्या प्रवाशाचे नाव आहे. याप्रकरणी शिवाजीनगर पोलीस ठाण्यात अकस्मात मृत्यू अशी नोंद करण्यात आली आहे. मनोज कुमार सोमवारी (१ जुलै) सायंकाळी साडेसहाच्या सुमारास जिल्हा न्यायालय मेट्रो स्थानकातील सरकत्या जिन्यावरुन निघाले होते. त्यावेळी ते अचानक जिन्यावरुन पडले. मेट्रो स्थानकातील सुरक्षारक्षकांनी हा प्रकार पाहिला आणि तातडीने सरकत्या जिन्याची यंत्रणा बंद केली. त्यांना मेट्रो स्थानकातील वैद्यकीय कक्षात नेण्यात आले. मनोज कुमार गंभीर जखमी झाल्याने त्यांना तातडीने मेट्रोतील कर्मचाऱ्यांनी रुग्णालयात हलविले. उपचारांपूर्वीच त्यांचा मृत्यू झाला होता.

हेही वाचा : मेट्रो स्थानकात प्रवाशाचा मृत्यू; सरकत्या जिन्यावरून उतरताना घटना; पोलीस सीसीटीव्ही फुटेज तपासणार

मेट्रोच्या अधिकाऱ्यांनी या घटनेची माहिती पोलिसांना दिली. शिवाजीनगर पोलिसांनी घटनास्थळी धाव घेतली. मनोज कुमार यांचा मृतदेह ससून रुग्णालयात शवविच्छेदनासाठी पाठविण्यात आला. त्यांचा मृत्यूमागचे कारण शवविच्छेदन अहवालातून समजेल. ते जिन्यावरुन कसे पडले, यादृष्टीने तपास करण्यात येत आहे. या घटनेची मेट्रो अधिकाऱ्यांनी गंभीर दखल घेतली असून, सरकत्या जिन्याची तपासणी करण्यात आली.