पिंपरी : रावेत येथील आवास योजनेचा प्रकल्प रद्द केल्यानंतर या प्रकल्पातील लाभार्थ्यांना आता आर्थिकदृष्ट्या दुर्बल घटकांतर्गत प्राप्त होणाऱ्या किवळेतील सदनिका देण्यात येणार आहेत. या एका सदनिकेची किंमत १३ लाख ७१८ रुपये आहे. या दरामध्ये ज्या लाभार्थ्यांना लाभ घ्यावयाचा आहे, त्या लाभार्थ्यांनी १५ मार्चपर्यंत संमतीपत्र सादर करण्याचे आवाहन महापालिकेने केले आहे.

किवळे येथे आर्थिकदृष्ट्या दुर्बल घटकांसाठी ७५५ सदनिका उभारण्यात येत आहेत. या सदनिका आता प्रधानमंत्री आवास योजनेंतर्गत रावेत प्रकल्पातील निवड झालेल्या पात्र लाभार्थ्यांना देण्यात येणार आहेत. या ७५५ सदनिकांपैकी ३७८ सदनिका सर्वसाधारण प्रवर्गातील लाभार्थ्यांना, २२६ सदनिका इतर मागासवर्गीय प्रवर्गातील लाभार्थ्यांना, ९८ सदनिका अनुसूचित जाती प्रवर्गातील लाभार्थ्यांना, ५३ सदनिका अनुसूचित जमाती प्रवर्गातील लाभार्थ्यांना देण्यात येणार आहेत, तर ३८ सदनिका या अपंग लाभार्थ्यांसाठी राखीव असणार आहेत.

रावेत प्रकल्पातील लाभार्थी हे प्रथम येणाऱ्यास प्राधान्य या धोरणानुसार संमतीपत्र देऊन या सदनिकांचा लाभ घेऊ शकणार आहेत. लाभार्थ्यांनी झोपडपट्टी निर्मूलन व पुनर्वसन विभागाकडे संमतीपत्र सादर करावे. या संमतीपत्राचा मसुदा लाभार्थ्यांनी झोपडपट्टी निर्मूलन व पुनर्वसन विभागाच्या कार्यालयातून घ्यावा आणि आवश्यक माहिती भरून सादर करावा. लाभार्थ्यांना सदनिकांचा लाभ घेताना संमतीपत्रासोबत आवश्यक कागदपत्रेही सादर करावी लागणार आहेत. त्यानंतर महापालिकेचे निकष पूर्तता करणाऱ्या अर्जदारांनाच किवळे प्रकल्पातील सदनिका वाटप करण्यात येणार आहे. याशिवाय सदनिका हस्तांतरणाबाबतच्या प्रक्रियेमध्ये बदल करणे, या प्रक्रियेला स्थगिती देणे अथवा रद्द करण्याचे अधिकार महापालिकेने राखून ठेवल्याचे आयुक्त सिंह यांनी सांगितले.

संमतीपत्रासोबत जोडावी लागणार कागदपत्रे

तीन लाखांपर्यंतचा उत्पन्न दाखला, अर्जदाराचे जात प्रमाणपत्र, जातवैधता प्रमाणपत्र, अर्जदार व कुटुंबातील सदस्यांचे आधार कार्ड, पॅनकार्ड, बँक पासबुक छायांकित प्रत, मतदान ओळखपत्र, भाडेकरार, संमतीपत्र, वीजबिल, रहिवासी प्रमाणपत्र संमती पत्रासोबत जोडावे लागणार आहे.

किवळे येथे आर्थिकदृष्ट्या दुर्बल घटकांसाठीच्या ७५५ सदनिका उपलब्ध होणार आहेत. या सदनिका रद्द झालेल्या रावेत प्रकल्पातील पात्र लाभार्थ्यांना देण्यात येणार आहेत, असे आयुक्त शेखर सिंह यांनी सांगितले.

Story img Loader