पुणे : भारतीय जनता पक्षाच्या ‘महाविजय २४’ या अभियाना अंतर्गत पुणे लोकसभा निवडणुकीसाठी महापालिकेचे माजी सभागृह नेते श्रीनाथ भिमाले यांची समन्वयक म्हणून नियुक्ती करण्यात आली आहे. तसे पत्र प्रदेशाध्यक्ष चंद्रशेखर बावनकुळे यांनी भिमाले यांना गुरूवारी पुण्यात दिले. प्रदेश सरचिटणीस मुरलीधर मोहोळ, विक्रांत पाटील, प्रदेश उपाध्यक्ष राजेश पांडे, शहराध्यक्ष धीरज घाटे, जगदीळ मुळीक यावेळी उपस्थित होते. भिमाले यांनी १९९८ साली भाजपा युवा मोर्चामधून राजकीय कारकिर्दीला सुरुवात केली. सन २००२ मध्ये पुणे महापालिकेचे नगरसेवक म्हणून ते विजयी झाले. सन २०१२ साली पुणे शहर सरचिटणीस आणि २०१७ साली पुणे महापालिकेच्या सभागृह नेतेपदाची धुराही त्यांनी सांभाळली आहे.
हेही वाचा : भाजपचे राष्ट्रीय अध्यक्ष जे. पी. नड्डा पुण्यात दाखल
आगामी लोकसभा निवडणुकीच्या पार्श्वभूमीवर भिमाले यांना ही जबाबदारी मिळाली आहे. शिवाय पुणे लोकसभा अंतर्गत असणाऱ्या सहा विधानसभा मतदारसंघांचे समन्वयक म्हणूनही भिमाले यांच्याकडे जबाबदारी असणार आहे. नियुक्तीबाबत भिमाले म्हणाले, ‘उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे, पालकमंत्री चंद्रकांत पाटील आणि प्रदेश सरचिटणीस मुरलीधर मोहोळ यांनी आणि पक्षाने माझ्यावर टाकलेला विश्वास आगामी काळात सार्थ करण्याचा प्रयत्न आहे. पुणे लोकसभेवर पुन्हा एकदा भारतीय जनता पक्षाचा झेंडा फडकेल. यासाठी सर्वांना सोबत घेऊन काम करण्याचा मानस आहे. संघटनेत मिळालेली जबाबदारी पूर्ण क्षमतेने पार पडली असून नवी जबाबदारीही पूर्ण क्षमतेने आणि समर्पण भावनेतून निभावली जाईल’.
