पुणे : शहरात वेगवेगळ्या अपघातात तिघांचा मृत्यू

नगर रस्त्यावर लोणीकंद परिसरात भरधाव वाहनाच्या धडकेत दुचाकीस्वाराचा मृत्यू झाल्याची घटना घडली. रमेश राजेंद्र गायकवाड (वय ४२, रा. वाडेगाव, ता. शिरुर, जि. पुणे ) असे मृत्युमुखी पडलेल्या दुचाकीस्वाराचे नाव आहे. याबाबत गायकवाड यांची पत्नी कविता (वय ३७) यांनी लोणीकंद पोलीस ठाण्यात फिर्याद दिली आहे. पोलिसांनी दिलेल्या माहितीनुसार, दुचाकीस्वार रमेश हे लोणीकंद परिसरातील थेऊर रस्त्याने निघाले होते. त्या वेळी भरधाव वाहनाने दुचाकीस्वार गायकवाड यांना धडक दिली. अपघातात गायकवाड यांचा मृत्यू झाला. पोलीस उपनिरीक्षक दिलीप पालवे तपास करत आहेत.

एसटीच्या धडकेत पादचाऱ्याचा मृत्यू

एसटीच्या धडकेत पादचाऱ्याचा मृत्यू झाल्याची घटना पुणे-सोलापूर रस्त्यावरील हडपसर भागात घडली. काळूराम नंदकुमार जाधव (वय ५०, रा. भेकराईनगर, फुरसुंगी, हडपसर) असे मृत्युमुखी पडलेल्या पादचाऱ्याचे नाव आहे. याप्रकरणी एसटी बसचालक मिलिंद तुकाराम कांबळे (वय ४२, रा. खासापुरी, परांडा, जि. धाराशिव) याला अटक करण्यात आली. याबाबत पोलीस कर्मचारी संतोष कांबळे यांनी वानवडी पोलीस ठाण्यात फिर्याद दिली आहे. जाधव हे शुक्रवारी सकाळी अकराच्या सुमारास पुणे-सोलापूर रस्त्यावरील रामटेकडी परिसरातून निघाले होते. त्यावेळी उड्डाणपुलावर भरधाव एसटी बसने पादचारी जाधव यांना धडक दिली. अपघातात जाधव यांचा जागीच मृत्यू झाला. पोलीस उपनिरीक्षक चौगुले तपास करत आहेत.