पुणे : विवाह नोंदणीविषयक संकेतस्थळावर झालेली ओळख एका तरुणीला महागात पडली. विवाहाच्या आमिषाने तरुणीची चार लाख रुपयांची फसवणूक करण्यात आल्याचा प्रकार उघडकीस आला असून, या प्रकरणी कोथरुड पोलीस ठाण्यात गुन्हा दाखल करण्यात आला आहे. याबाबत एका तरुणीने कोथरुड पोलीस ठाण्यात फिर्याद दिली आहे. तिने दिलेल्या फिर्यादीनुसार, एकाविरुद्ध गुन्हा दाखल करण्यात आला आहे. तक्रारदार तरुणी कोथरुड भागात राहायला आहे.
हेही वाचा : ‘राष्ट्रवादीने सिंचन, बँक घोटाळा केला ना? मग चौकशी करा’, मोदींना आव्हान देताना अजित पवारांची कोंडी
तरुणीने विवाह नोंदणी संकेतस्थळावर नावनोंदणी केली होती. त्यानंतर तरुणाने तरुणीशी ओळख वाढविली. विवाह करण्यास उत्सुक असल्याचे सांगून त्याने तिला जाळ्यात ओढले. तरुणीला वेगवेगळी कारणे सांगून त्याने पैसे उकळले. तरुणीने तीन बँकांच्या खात्यात वेळोवेळी चार लाख दहा हजार रुपये जमा केले. आरोपीच्या खात्यात पैसे जमा केल्यानंतर तो वापरत असलेले चार ते पाच मोबाइल क्रमांक बंद असल्याचे लक्षात आले. त्यानंतर तरुणीने सायबर पोलीस ठाण्यात तक्रार दिली. सायबर पोलिसांनी संबंधित गुन्हा कोथरुड पोलीस ठाण्यात तपासासाठी वर्ग केला आहे. वरिष्ठ पोलीस निरीक्षक संदीप देशमाने तपास करत आहेत.
