कारवाईची भीती दाखवून तरुणाची २१ लाखांची फसवणूक, सायबर चोरट्यांविरुद्ध गुन्हा

याबाबत एका तरुणाने भारती विद्यापीठ पोलीस ठाण्यात फिर्याद दिली आहे. तक्रारदार तरुण कात्रज भागात राहायला आहे. सायबर चोरट्यांनी तरुणाच्या मोबाइल क्रमांकावर २९ ऑक्टोबर रोजी संपर्क साधला. अमली पदार्थ विक्री प्रकरणात अमली पदार्थ विरोधी पथकाकडून (नार्कोटिक्स कंट्रोल ब्युरो-एनसीबी) कारवाई करण्यात येणार आहे. अटक टाळण्यासाठी तातडीने पैसे जमा करावे लागतील, अशी बतावणी चोरट्याने त्याच्याकडे केली. त्यानंतर चोरट्याने तरुणाला तातडीने एका बँक खात्यात पैसे जमा करण्यास सांगितले.

हेही वाचा : पिंपरी : बिर्याणी चांगली बनवली नाही म्हणून सिलिंडरची टाकी डोक्यात घालून खून

तरुणाने चोरट्यांनी दिलेल्या बँक खात्यात वेळोवेळी २० लाख ९० हजार रुपये जमा केले. पैसे जमा केल्यनंतर चोरट्यांनी पुन्हा त्याच्याशी संपर्क साधला. चौकशीत फसवणूक झाल्याचे लक्षात आल्यानंतर तरुणाने पोलीस ठाण्यात धाव घेऊन तक्रार दिली. गुन्हे शाखेच्या पोलीस निरीक्षक संगीता देवकाते तपास करत आहेत. गेल्या काही महिन्यांपासून कारवाईची भीती दाखवून नागरिकांची सायबर चोरट्यांकडून फसवणूक करण्याचे प्रकार वाढीस लागले आहेत. चोरट्यांनी आतापर्यंत कोट्यवधी रुपयांची फसवणूक केली आहे.

हेही वाचा : पिस्तूल बाळगणारे सराइत अटकेत, सिंहगड रस्त्यावरील धायरी परिसरात कारवाई

शेअरमध्ये गुंतवणुकीच्या आमिषाने २९ लाखांची फसवणूक

शेअर बाजारात गुंतवणुकीच्या आमिषाने फसवणुकीचे सत्र कायम आहे. सायबर चोरट्यांनी वेगवेगळ्या घटनेत महिलेसह दोघांची २९ लाख रुपयांची फसवणूक केली. याप्रकरणी चतु:शृंगी पोलीस ठाण्यात दोन स्वतंत्र गुन्हे दाखल करण्यात आले आहेत. पाषाण भागातील एका महिलेची शेअर बाजारात गुंतवणुकीच्या आमिषाने चोरट्यांनी १९ लाख ६६ हजार रुपयांची फसवणूक केली. अशाच पद्धतीने सायबर चोरट्यांनी ओैंध भागातील एकाची नऊ लाख दहा हजार रुपयांची फसवणूक केली.