लोकसत्ता प्रतिनिधी
पुणे: जिल्ह्यातील १३ तालुक्यांपैकी इंदापुरात सर्वाधिक ९०५१ हेक्टर फळबाग क्षेत्र आहे. तसेच जिल्ह्यातील शेतकऱ्यांनी डाळिंब पिकाचे उत्पादन घेण्याला पसंती दिली आहे. या पिकाचे ५०३७ हेक्टर क्षेत्रावर उत्पादन घेण्यात येत आहे.
विधानभवन येथे सोमवारी (८ मे) जिल्ह्याची खरीप हंगामपूर्व आढावा बैठक पार पडली. त्यामध्ये ही माहिती समोर आली आहे. जिल्ह्यात एकूण फळबाग क्षेत्र २५ हजार ९६९ हेक्टर आहे. डाळिंब, सीताफळ, द्राक्ष, आंबा, पेरू, केळी, लिंबू, अंजीर, चिकू, नारळ, पपई, चिंच, संत्रा, मोसंबी आणि इतर फळांचा समावेश आहे. त्यापैकी डाळिंब पिकाचे क्षेत्र ५७३७ हेक्टर आहे. सीताफळ ४५१९ हे., द्राक्ष ४२८५ हे., आंबा ४२३४ हे., पेरू २३२१ हे., केळी १५६२ हे., लिंबू ६९२ हे., अंजीर ६१७ हे., चिकू ५९० हे., नारळ ३४९ हे., पपई ३३६ हे., चिंच १७२ हे., संत्रा १०४ हे., मोसंबी ८३ हे. आणि इतर फळांची ६८८ हेक्टरवर लागवड करण्यात येते. तसेच जिल्ह्यातील १३ तालुक्यांपैकी इंदापुरात सर्वाधिक ९०५१ हेक्टर क्षेत्रावर फळांचे उत्पादन घेण्यात येते. त्यानंतर पुरंदरमध्ये ३७३९ हे., जुन्नर २९३९ हे., शिरूर २२३३ हे., दौंड २०१६ हे., बारामती १८२० हे., भोर १२१५ हे., हवेली १०७७ हे., आंबेगाव ६८२ हे., खेड ४३३, मावळ ४२० हे., वेल्हा १९० हे. आणि मुळशीत १५३ हेक्टरवर फळ उत्पादन घेण्यात येते, असे जिल्हा प्रशासनाकडून सांगण्यात आले.
