पुणे : देशातील छोटे शॉपिंग मॉल घोस्ट मॉल बनू लागले आहेत अथवा रिकामे पडू लागले आहेत. ऑनलाइन खरेदी आणि मोठ्या शॉपिंग मॉलकडे ग्राहक वळू लागल्याने छोटे शॉपिंग मॉल बंद पडत आहेत. देशातील २९ शहरांतील एकूण १.३३ कोटी चौरस फूट क्षेत्रफळावर रिकामे मॉल आहेत. या रिकाम्या मॉलची संख्या वाढल्याने २०२३ मध्ये विकसकांना ६७ अब्ज रुपयांचा फटका बसला आहे.
हेही वाचा >>> कांद्याची निर्यात सुरू; तरीही दरात पडझड
नाइट फ्रँक इंडियाने देशातील रिटेल क्षेत्राचा थिंक इंडिया थिंक रिटेल २०२४ अहवाल जाहीर केला आहे. त्यानुसार, देशातील प्रमुख बाजारपेठांमधील रिकाम्या मॉलचे एकूण क्षेत्रफळ २०२३ मध्ये ५९ टक्क्यांनी वाढले. एखादा मॉलमधील ४० टक्के दालने रिकामी असतील तर त्याला घोस्ट मॉल म्हटले जाते. दिल्लीत सर्वाधिक ५३ लाख चौरस फुटांचे रिकामे मॉल आहेत. त्यात गेल्या वर्षी ५८ टक्के वाढ नोंदविण्यात आली. त्याखालोखाल मुंबईत २१ लाख चौरस फुटांचे रिकामे मॉल असून, त्यात ८६ टक्के वाढ झाली आहे. बंगळुरूमध्ये २० लाख चौरस फुटांचे रिकामे मॉल असून, त्यामध्ये ४६ टक्के वाढ नोंदविण्यात आली आहे. हैदराबादमध्ये मात्र रिकाम्या मॉलमध्ये १९ टक्के घट झाली असून, ते ९ लाख चौरस फुटांवर आले आहेत. देशातील प्रमुख महानगरांचा विचार करता एकूण शॉपिंग सेंटरच्या संख्येत गेल्या वर्षी घट झाली. गेल्या वर्षभरात १६ शॉपिंग सेंटर बंद पडली. याचवेळी या महानगरांत ८ नवीन शॉपिंग सेंटरची निर्मिती होऊन एकूण संख्या २६३ झाली. रिकामी पडलेली शॉपिंग सेंटर नवीन निवासी अथवा व्यावसायिक प्रकल्पासाठी पाडण्यात आली, कायमची बंद करण्यात आली अथवा त्यांचा लिलाव करण्यात आला, असे अहवालात नमूद करण्यात आले आहे.
