लोकसत्ता प्रतिनिधी
पिंपरी: हिंजवडीतील गणेश विसर्जन मिरवणुकीदरम्यान एका तरुणाचा मृत्यू झाला. ध्वनिवर्धकाच्या (डीजे) आवाजामुळे मृत्यू झाल्याचे सुरुवातीला सांगण्यात आले होते. परंतु, तरुणाला मागील सहा महिन्यांपासून हृदयाचा त्रास होता. चक्कर येवून खाली पडल्याने मृत्यू झाल्याचे सांगण्यात आले.
योगेश अभिमन्यू साखरे (वय २३, रा.मारुती मंदिरासमोर, हिंजवडी गावठाण) असे मृत्यू झालेल्या तरुणाचे नाव आहे. बुधवारी हिंजवडीतील सार्वजनिक गणेश मंडळांच्या मूर्तींचे विसर्जन झाले. योगेश हा हनुमान तालीम मित्र मंडळाचा कार्यकर्ता होता. मिरवणुकीमध्ये नृत्य करताना डीजेच्या आवाजाने त्याला चक्कर आली. गोळी आणण्यासाठी मेडिकलमध्ये गेला असता खाली कोसळून त्याचा मृत्यू झाल्याचे सांगितले होते. परंतु, योगेश हा मिरवणुकीत नृत्य करत नव्हता. डीजेच्या आवाजामुळे त्याचा मृत्यु झाला नसल्याचे पोलिसांनी सांगितले.
आणखी वाचा-जेजुरीतल्या कडेपठारावर अल्पवयीन मुलीवर अत्याचाराचा प्रयत्न करणारा नराधम अटेकत, पोलिसांची कारवाई
पोलिसांनी दिलेल्या माहितीनुसार, योगेश साखरे याला मागील सहा महिन्यापूर्वी बीपीचा त्रास होत होता. तो हिंजवडी येथील स्थानिक डॉक्टरांकडे निदानासाठी गेला असता तेथील डॉक्टरने हृदयाचा त्रास असल्याचे सांगितले. कोकणी चौक येथील डॉक्टरला दाखवून उपचार घेण्याचा सल्ला दिला. बुधवारी रात्री योगेश हिंजवडी चौकात असताना त्याच्या छातीत दुखू लागले. तो मेडिकलमध्ये गोळ्या घेण्यासाठी आला होता. योगेश हा कुठल्याही डीजे समोर नाचत नव्हता असे प्रत्यक्षदर्शी सांगत आहेत. तसेच तो ज्या मेडिकल समोर उभा होता त्या ठिकाणी जवळपास कुठलाही डीजे वाजत नव्हता. मेडिकल जवळ असताना त्याने तेथे आलेले त्याच्या मित्रांना सांगितले की त्याला चक्कर येत आहे आणि तो लगेच चक्कर येऊन जमिनीवर पडला. मित्राने तेथेच जवळ असलेल्या खासगी रुग्णालयात दाखल केले. तेथील डॉक्टरांनी दुसऱ्या रुग्णालयात दाखल होण्यास सांगितले. रुग्णालयात गेले असता डॉक्टरांनी योगेश याचे निधन झाल्याचे सांगितले.
