‘कसब्या’त पुन्हा धंगेकर विरुद्ध रासने

विधानसभा निवडणुकीच्या उमेदवारांची दुसरी यादी शनिवारी भाजपने जाहीर केली. यामध्ये २२ उमेदवारांच्या नावांची घोषणा करण्यात आली असून पुणे शहरातील तीन मतदारसंघांतील उमेदवारांचा यात समावेश आहे. पुणे कॅन्टोन्मेंटमधून विद्यामान आमदार सुनील कांबळे तर खडकवासलामधून भीमराव तापकीर यांच्या नावाची घोषणा करण्यात आली. राष्ट्रवादी (शरद पवार) पक्षाकडून खडकवासला मतदारसंघातून माजी नगरसेवक सचिन दोडके यांना, तर पर्वतीमधून स्थायी समितीच्या माजी अध्यक्षा अश्विनी कदम यांना पुन्हा एकदा उमेदवारी देण्यात आली आहे. त्यामुळे कसबा, खडकवासला तसेच पर्वती विधानसभा मतदारसंघांत २०१९ प्रमाणेच लढती पाहायला मिळणार आहेत.

हेही वाचा : सांगली जिल्ह्यात आघाडीतील गोंधळ संपता संपेना; मिरज, खानापूरमध्ये जागेवरून तर सांगलीत उमेदवारीवरून वाद

u

भाजपचा बालेकिल्ला अशी एकेकाळी ओळख असलेल्या कसबा मतदारसंघात काँग्रेसचे रवींद्र धंगेकर हे विद्यामान आमदार आहेत. कसब्याच्या आमदार मुक्ता टिळक यांच्या निधनाने रिक्त झालेल्या जागेसाठी अडीच वर्षापूर्वी येथे पोटनिवडणूक झाली होती. त्यावेळी भाजपने हेमंत रासने यांना उमेदवारी दिली होती. या निवडणुकीत ब्राह्मण उमेदवार न दिल्याने नाराज झालेला मतदार मतदानासाठी बाहेर पडला नाही त्यामुळे काँग्रेसचे धंगेकर येथून आमदार म्हणून निवडून आले. या निवडणुकीत भाजप कोणाला संधी देणार याकडे लक्ष लागले होते. रासने यांच्यासह भाजपचे शहराध्यक्ष धीरज घाटे, दिवंगत खासदार गिरीश बापट यांच्या स्नूषा स्वरदा बापट, दिवंगत आमदार मुक्ता टिळक यांचे पुत्र कुणाल टिळक हे इच्छुक होते.

या मतदारसंघातून ब्राह्मण उमेदवार द्यावा, अशी मागणी केली जात असल्याने भाजपने जाहीर केलेल्या उमेदवारांच्या पहिल्या यादीत कसब्याचा उमेदवार जाहीर करण्यात आला नव्हता. शनिवारी रासने यांच्या उमेदवारीवर शिक्कामोर्तब करण्यात आले. त्यामुळे या मतदारसंघात आता धंगेकर विरुद्ध हेमंत रासने अशी लढत पुन्हा पाहायला मिळणार आहे. त्यातच मनसेकडून गणेश भोकरे यांना संधी देण्यात आली आहे.

खडकवासला विधानसभा मतदारसंघातून भाजपने आमदार भीमराव तापकीर यांना तर राष्ट्रवादी (शरद पवार) पक्षाकडून माजी नगरसेवक सचिन दोडके यांना पुन्हा उमेदवारी देण्यात आली आहे. पाच वर्षांपूर्वी झालेल्या २०१९ च्या विधानसभा निवडणुकीत तत्कालीन राष्ट्रवादीकडून उमेदवारी मिळालेल्या दोडके यांनी भाजपचे विद्यामान आमदार भीमराव तापकीर यांना कडवी लढत दिली होती. या निवडणुकीत अवघ्या तीन हजार मतांनी दोडके यांना पराभवाला सामोरे जावे लागले होते. राष्ट्रवादी काँग्रेसमध्ये पडलेल्या फुटीनंतर सचिन दोडके यांनी ज्येष्ठ नेते शरद पवार यांच्याबरोबर राहणे पसंद केले. पाच महिन्यांपूर्वी झालेल्या लोकसभेच्या निवडणुकीत राष्ट्रवादी (शरद पवार) पक्षाच्या नेत्या खासदार सुप्रिया सुळे यांच्या प्रचारात दोडके यांनी मोठी भूमिका बजाविली होती. त्यामुळे त्यांना पुन्हा एकदा संधी देण्यात आली आहे. याच मतदारसंघातून मनसेने दिवंगत आमदार रमेश वांजळे यांचे पुत्र मयुरेश वांजळे यांना मैदानात उतरविले आहे. त्यामुळे येथे तिरंगी लढत पाहायला मिळणार आहे.

हेही वाचा : चैनसुख संचेती सातव्यांदा ‘मलकापूर ‘ रणसंग्रामात! मागील लढतीतील प्रतिस्पर्धीच रिंगणात, दुरंगी लढत अटळ

पर्वती विधानसभेसाठी राष्ट्रवादी (शरद पवार) पक्षाने स्थायी समितीच्या माजी अध्यक्ष अश्विनी कदम यांना पुन्हा एकदा संधी देण्याचा निर्णय घेण्यात आला आहे. भाजपने आमदार माधुरी मिसाळ यांना उमेदवारी जाहीर केली आहे. याच मतदारसंघातून काँग्रेसचे माजी उपमहापौर आबा बागुल इच्छुक असून दोन दिवसांपूर्वी त्यांनी अपक्ष म्हणून आपला उमेदवारी अर्ज देखील दाखल केला आहे. त्यामुळे येथे चांगलीच लढत पाहायला मिळणार आहे.

कॅन्टोन्मेंटमधून भाजपने विद्यामान आमदार सुनील कांबळे यांना उमेदवारी दिली आहे. मात्र महाविकास आघाडीच्या जागावाटपामध्ये ही जागा काँग्रेसकडे असून त्यांनी अद्यापही आपला उमेदवार जाहीर केलेला नाही.