पुणे : आर्थिक वादातून वकिलाने मित्राच्या वडिलांचे अपहरण केल्याची घटना उघडकीस आली. याप्रकरणी एका वकिलाविरुद्ध हडपसर पोलीस ठाण्यात गुन्हा दाखल करण्यात आला असून त्याला अटक करण्यात आली आहे. नितीन म्हस्के (रा. छत्रपती संभाजीनगर) असे अटक करण्यात आलेल्याचे नाव आहे. त्याच्याबरोबर असलेल्या चार ते पाच साथीदारांविरुद्ध गुन्हा दाखल करण्यात आला आहे. हेही वाचा - बदलापूरच्या घटनेच्या निषेधार्थ पुण्यात शरद पवार, सुप्रिया सुळेंचे मूक आंदोलन सुरू, महाविकास आघाडीतील नेतेमंडळी सहभागी हेही वाचा - धक्कादायक ! दहावीतील विद्यार्थिनीचा शाळेच्या आवारात हदयविकाराच्या झटक्याने मृत्यू हडपसर भागातील भाजी मंडई परिसरात नुकतीच ही घटना घडली. याबाबत एकाने हडपसर पोलीस ठाण्यात फिर्याद दिली आहे. तक्रारदार मूळचे छत्रपती संभाजीनगरचे आहेत. पाटबंधारे विभागातून ते निवृत्त झाले आहे. फिर्यादीचा मुलगा आणि म्हस्के मित्र आहेत. म्हस्के आणि तक्रारदाराच्या मुलात आर्थिक व्यवहार झाला होता. म्हस्के त्याला पैसे मागत होता. निवृत्त अधिकारी आणि त्यांचा मुलगा हडपसर भागात वास्तव्यास असल्याची माहिती म्हस्केला मिळाली. त्यानंतर तो साथीदारांसोबत हडपसर भागात आला. १९ ऑगस्ट रोजी फिर्यादीचे हडपसर भागातून अपहरण केले. त्यानंतर म्हस्केने त्यांच्या मुलाच्या मोबाइलवर संपर्क साधला. एक कोटी रुपये येणे आहे. ६० लाख रुपये दिले तर, वडिलांना सोडू, अशी धमकी म्हस्केने दिली. त्यानंतर छत्रपती संभाजीनगर परिसरातील वाळुंज पोलीस ठाण्यासमोर निवृत्त अधिकाऱ्याला सोडून म्हस्के आणि साथीदार पसार झाले. पुण्यात परतल्यानंतर त्यांनी हडपसर पोलीस ठाण्यात फिर्याद दिली.
