पुणे : कोथरूडमधील गुरूगणेशनगर परिसरात नियोजित गृहप्रकल्पाच्या चौथ्या मजल्यावरुन एका मजुराचा मृत्यू झाल्याची घटना घडली. संजय हरिभाऊ वाळंज (वय ४८, रा. किष्किंदानगर, कोथरूड ) असे मृत्युमुखी पडलेल्या मजुराचे नाव आहे. या प्रकरणी बांधकाम व्यावसायिकासह ठेकेदारांच्या विरुद्ध कोथरुड पोलिसांनी गुन्हा दाखल केला आहे. याबाबत वाळंज यांची पत्नी सारिका (वय ४०) यांनी कोथरुड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, कोथरुडमधील गुरुगणेशनगर परिसरात नियोजित गृहप्रकल्पाचे काम सुरू आहे. नियोजित गृहप्रकल्पातील चौथ्या मजल्यावर वाळंज काम करत होते. त्या वेळी चवथ्या मजल्यावरुन पडून वाळंज गंभीर जखमी झाले. त्यांना तातडीने रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. बांधकाम व्यावसायिक तसेच ठेकेदारांनी बांधकाम सुरक्षिततेसाठी आवश्यक उपाययोजना न केल्याने दुर्घटना घडल्याने पोलिसांनी या प्रकरणी गुन्हा दाखल केला. पोलीस उपनिरीक्षक पांढरे तपास करत आहेत.