पुण्यात भरदिवसा एका माथेफिरूने एकतर्फी प्रेमातून तरुणीवर कोयत्याने हल्ला केला. यावेळी अनेकांनी बघ्याची भूमिका घेतलेली असताना लेशपाल जवळगे या तरुणाने हल्लेखोराला रोखत तरुणीचा जीव वाचवला. यानंतर त्याचं सर्वच स्तरातून कौतुक होत आहे. आता लेशपालची आई लक्ष्मी जवळगे यांनीही मुलाच्या या धाडसावर प्रतिक्रिया दिली. यात त्यांनी मुलाला काही कमी-जास्त व्हायला नको असा विचार येऊन भीती वाटते, अशी भावना व्यक्त केली. त्या आढेगावमध्ये एका स्थानिक वृत्तवाहिनीला दिलेल्या प्रतिक्रियेत बोलत होत्या.
लेशपालची आई लक्ष्मी जवळगे म्हणाल्या, “मुलाला काही कमी-जास्त व्हायला नको असा विचार येऊन भीती वाटते. लेशपाल असाच शिकावा आणि मोठा व्हावा असंही वाटतं. त्याला सहावीपासून शाळेसाठी बाहेरगावी पाठवलं होतं. स्पर्धा परीक्षेची तयारी करायचं म्हटला आणि पुण्याला गेला. दोन दिवसांपूर्वीच त्याने दर्शना पवारच्या हत्येविषयी सांगितलं होतं. तेव्हा आम्ही त्याला घरी ये म्हटलो होतो.”
“तो मला म्हणाला की, घाबरू नकोस”
“मी लेशपाल आणि त्याच्या बहिणीला घरी यायला सांगितलं. त्यानंतर तो मला म्हणाला की, घाबरू नकोस. त्यानंतर मुलीने लेशपालने पुण्यात तरुणीला कोयता हल्ल्यातून वाचवल्याचं सांगण्यासाठी फोन केला. तिने काय घडलं ते सांगितलं,” अशी माहिती लक्ष्मी जवळगे यांनी दिली.
“ती म्हणाली की, नऊ-साडेनऊ वाजता घटना घडली. मी मुलीकडे आणखी चौकशी केली, तर ती म्हणाली की, मला १५-२० मिनिटांनी माहिती कळेल. अर्ध्या तासात ती घटना घडली तेथे पोहचली. त्यानंतर तिने मला सांगितलं की लेशपाल घटना घडली तिथं नव्हता. तो तेथून गेला होता,” असंही लेशपालच्या आईने नमूद केलं.
