भारतीय भाषांच्या माध्यमातून राष्ट्रीय एकात्मतेची उपासना करणारे कोशकार आणि राष्ट्रनिष्ठ कवी अशी विश्वनाथ नरवणे यांची ओळख होती. भाषा-व्यवहार कोशाच्या निमित्ताने नरवणे यांनी फार मोठे कार्य केले, असे मनोगत ज्येष्ठ साहित्यिक डॉ. न. म. जोशी यांनी मंगळवारी व्यक्त केले.एसएनडीटी महाविद्यालयालगतच्या रस्त्याचे नामकरण कोशकार विश्वनाथ दिनकर नरवणे असे करण्यात आले. या कार्यक्रमात डॉ. जोशी बोलत होते. स्थानिक नगरसेविका माधुरी सहस्रबुद्धे यांनी या कार्यक्रमाचे आयोजन केले होते. डॉ. आरती दातार, प्रा. कविता नरवणे, प्रा. मालुसरे आदींची या वेळी प्रमुख उपस्थिती होती. नरवणे यांच्या सोळा भाषांमधील कोशाचे प्रकाशन तत्कालीन पंतप्रधान पं. नेहरू यांनी केले होते. त्याबरोबरच सोळा भाषांमधील म्हणी आणि वाक्प्रचार यासंबंधीही त्यांनी केलेले संशोधन व लेखन महत्त्वपूर्ण होते, असे नरवणे यांचे स्नेही पंडित यांनी या वेळी सांगितले. विविध शैक्षणिक संस्थांच्या परिसरातील या रस्त्याला कोशकार नरवणे यांचे नाव दिल्याबद्दल प्रा. कविता नरवणे यांनी समाधान व्यक्त केले.
