पुण्यातील खासगी रुग्णालयांकडून नियम धाब्यावर! आरोग्य विभागाकडून कारवाईचे पाऊल

आरोग्य विभागाच्या तपासणी मोहिमेत खासगी वैद्यकीय व्यवसाय करणाऱ्या आणि किमान एक रुग्णशय्या असलेल्या रुग्णालयांचा समावेश आहे. याचबरोबर ॲलोपथी, आयुष, युनानी, नॅचरोपथी यासह सर्व शाखांच्या रुग्णालयांची तपासणी केली जात आहे. रुग्ण २४ तास दाखल करून घेतला जात नाही, अशा डे केअर सेंटरचा यात समावेश नाही. महापालिकेच्या आरोग्य विभागाने प्रत्येक क्षेत्रीय कार्यालयात क्षेत्रीय आरोग्य अधिकारी, परिचारिका आणि कर्मचारी अशा तीन जणांच्या पथकावर तपासणीची जबाबदारी सोपविली आहे. शहरातील १५ क्षेत्रीय कार्यालयांत अशी १५ पथके रुग्णालयांची तपासणी करीत आहेत.

सुधारणेसाठी महिन्याचा कालावधी

नियमांचे पालन न करणाऱ्या रुग्णालयांना नोटीस बजावून एक महिन्याचा कालावधी सुधारणा करण्यासाठी देण्यात आला आहे. काही रुग्णालयांनी या नोटिशीला उत्तर देऊन सुधारणा केल्याचे आरोग्य विभागाला कळविले आहे. एक महिना पूर्ण झाल्यानंतर आरोग्य विभागाकडून नोटीस पाठविलेल्या रुग्णालयांची तपासणी करून सुधारणा झाल्याची खात्री केली जाणार आहे. रुग्णालयांनी सुधारणा केली नसल्यास त्यानंतर त्यांच्यावर कारवाईचे पाऊल आरोग्य विभाग उचलणार आहे.

महापालिकेककडून खासगी रुग्णालयांची तपासणी मोहीम सुरू असून, उपचारांचे दरपत्रक दर्शनी भागात न लावणे, रुग्ण हक्क संहिता नसणे यांसह इतर नियमांचे पालन होत नसल्याचे काही ठिकाणी निदर्शनास आले. याप्रकरणी ७६ रुग्णालयांना नोटीस बजाविण्यात आली आहे.

डॉ. सूर्यकांत देवकर, सहायक आरोग्य अधिकारी, महापालिका

खासगी रुग्णालयांची तपासणी

एकूण खासगी रुग्णालये – ८४९

तपासणी झालेली रुग्णालये – ७१४

नोटीस पाठवलेली रुग्णालये – ७६