पुणे : मेहुणीच्या घरात चोरी करणाऱ्या एकास कोंढवा पोलिसांनी अटक केली. त्याच्याकडून आठ तोळ्यांचे सोन्याचे दागिने जप्त करण्यात आले आहेत.
कदीरपाशा पीरमहंमद सौदागर (वय ३२, रा. येरवडा) असे अटक करण्यात आलेल्याचे नाव आहे. याबाबत २६ वर्षीय मेहुणीने फिर्याद दिली होती. २१ मार्च रोजी कोंढव्यातील भाग्योदयनगर भागात ही घटना घडली होती. २१ मार्च रोजी सायंकाळी मेहुणी मुलीला घेऊन कामानिमित्त बाहेर गेली हाेती. त्या वेळी घरात कोणी नसल्याची संधी साधून सौदागर मेहुणीच्या घरात शिरला आणि त्याने कपाटातून आठ तोळ्यांचे सोन्याचे दागिने लांबविले.
हेही वाचा – पुणे : श्रीमंत दगडूशेठ हलवाई गणपतीला ११ हजार आंब्यांचा महानैवेद्य
याप्रकरणी गुन्हा दाखल झाल्यानंतर पोलिसांनी तपास सुरू केला. सौदागर याने मेहुणीच्या घरात चाेरी केल्याची माहिती तपासात मिळाली. सापळा लावून सौदागरला पकडण्यात आले. त्याच्याकडून आठ तोळ्यांचे सोन्याचे दागिने जप्त करण्यात आले. परिमंडळ पाचचे पोलीस उपायुक्त विक्रांत देशमुख यांच्या मार्गदर्शनाखाली कोंढवा पोलीस ठाण्याचे वरिष्ठ निरीक्षक संतोष सोनवणे, गुन्हे शाखेचे निरीक्षक संजय मोगले, उपनिरीक्षक स्वप्निल पाटील, सतीश चव्हाण, नीलेश देसाई, जोतिबा पवार, गोरखनाथ चिनके आदींनी ही कारवाई केली.
