लोकसत्ता प्रतिनिधी

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

पुणे : पत्नीवर रॉकेल ओतून तिचा खून करणाऱ्या एकाला अतिरिक्त सत्र न्यायाधीश पी. पी. जाधव यांनी जन्मठेपेची शिक्षा सुनावली. गंभीर भाजलेल्या पत्नीने ससून रुग्णालयात मृत्यूपूर्व जबाब दिला होता. जबाबाची चित्रफीत सरकार पक्षाकडून न्यायालयात सादर करण्यात आली. मृत्यूपूर्व जबाब, साक्ष, तसेच पुरावे ग्राह्य धरून न्यायालयाने शिक्षा सुनावली.

आणखी वाचा

तानाजी दत्ता उर्फ दत्तात्रय सरकाळे (वय २८, रा. तांदळी, शिरूर) असे शिक्षा सुनावलेल्या आरोपीचे नाव आहे. तानाजी आणि प्रियांका (वय २१) यांचा २०१३ मध्ये विवाह झाला होता. त्यांना एक मुलगा आहे. तानाजी हा प्रियांकाच्या चारित्र्यावर संशय घेऊन तिला मारहाण करायचा. या घटनेची माहिती मिळाल्यानंतर प्रियाकांच्या आई-वडिलांनी त्याला समजावून सांगितले होते. ७ मे २०१६ रोजी तानाजीने प्रियांकाशी वाद घालण्यास सुरुवात केली. त्याने तिच्या अंगावर रॉकेल ओतले. रॉकेल ओतल्यानंतर ती घरातून बाहेर पळाली. तानाजीने तिला पेटवून दिले. त्यानंतर तिच्या अंगावर पाणी ओतून तो पसार झाला होता. स्टोव्ह पेटविताना पत्नी भाजली, असा बचाव त्याने केला होता.

आणखी वाचा-

गंभीर भाजलेल्या प्रियांकाला तातडीने ससून रुग्णालयात दाखल करण्यात आले होते. तिने मृत्यूपूर्व जबाब ससून रुग्णालयात दिला होता. उपचारादरम्यान तिचा ११ मे रोजी मृत्यू झाला. या प्रकरणाचा तपास सहायक पोलीस निरीक्षक उत्तम भजनावळे यांनी केला. आरोपी तानाजीविरुद्ध आरोपपत्र दाखल केले. या खटल्यात अतिरिक्त सरकारी वकील नामदेव तरळगट्टी यांनी आठ साक्षीदारांची साक्ष नोंदवली. पत्नीचा मृत्यूपूर्व जबाब न्यायालयात सादर केला. साक्ष, तसेच पुरावे ग्राह्य धरून आरोपीला न्यायालयाने जन्मठेप आणि २५ हजार रुपये दंडाची शिक्षा सुनावली.