मावळ, शिरूर मतदारसंघातून भाजप विचारांचेच खासदार – मुख्यमंत्री

मावळ, शिरूर लोकसभा मतदारसंघातून भाजपच्या विचारांचेच खासदार निवडून येतील, असे सूचक विधान मुख्यमंत्री देवेंद्र फडणवीस यांनी शनिवारी निगडी प्राधिकरणात केले. काँग्रेस व राष्ट्रवादी एकत्र आले तरी भाजपला काहीही फरक पडणार नाही, असेही ते म्हणाले.

शिवसेनेचे खासदार असलेल्या मावळ व शिरूर लोकसभा मतदारसंघात भाजपने अटल संकल्प महासंमेलन घेत मुख्यमंत्र्यांच्या उपस्थितीत जोरदार शक्तिप्रदर्शन केले. प्रदेशाध्यक्ष रावसाहेब दानवे, महसूलमंत्री चंद्रकांत पाटील, पुण्याचे पालकमंत्री गिरीश बापट, रायगडचे पालकमंत्री रवींद्र चव्हाण, राज्यमंत्री दिलीप कांबळे, खासदार अमर साबळे, आमदार लक्ष्मण जगताप, महेश लांडगे, जिल्हाध्यक्ष बाळा भेगडे, महापौर राहुल जाधव आदींची सभेत उपस्थिती होती. सभेला तुडुंब गर्दी होती.

मावळ-शिरूर या दोन्ही मतदारसंघात आम्ही भाजपचे खासदार निवडून आणू, अशी ग्वाही आमदार लक्ष्मण जगताप व महेश लांडगे यांनी दिली, त्याचा संदर्भ देत मुख्यमंत्री म्हणाले, ही सभा कोणाच्याही विरोधात नाही आणि कोणाला ताकद दाखवण्यासाठी नाही. पालिका निवडणुकीत भाजपने सर्वाना धूळ चारली आहे. पंतप्रधान नरेंद्र मोदी यांना पािठबा देणारे खासदारच येथून निवडून येतील. तुम्ही पािठबा देणार नसाल तर आमचेच खासदार निवडून येतील. छत्रपती शिवाजी महाराजांच्या मावळ प्रांतातून आम्ही सुरूवात केली आहे. भ्रष्ट काँग्रेस व राष्ट्रवादीने काहीही केले नाही. महाराष्ट्रातील जनता त्यांना कंटाळली असून त्यांच्यात विश्वासार्हता राहिलेली नाही. त्यांनी समोरासमोर यावे, त्यांना खुले आव्हान आहे.

सर्व आश्वासने पूर्ण होतील

सर्व बेकायदा बांधकामे सरसकट नियमित करता येणार नाही, असा निकाल उच्च न्यायालयाने शुक्रवारी दिला, त्याचा संदर्भ देत न्यायालयाच्या निर्णयानुसारच बेकायदा बांधकामे नियमित केली जातील, असे मुख्यमंत्र्यांनी स्पष्ट केले. शहरात मेट्रो आणली, आयुक्तालय सुरू केले. शास्तीकर रद्द केला. पाण्याचा प्रश्नही सोडवला जाईल. शहरवासीयांना जी आश्वासने देण्यात आली, ती सर्व पूर्ण केली जातील, असे ते म्हणाले.