पुणे : कोथरूडमधील शास्त्रीनगर भागात दहशत माजविणारा गुंड ओंकार कुडले याच्यासह साथीदारांविरुद्ध महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई करण्याचे आदेश पोलीस आयुक्त रितेश कुमार यांनी दिले. पोलीस आयुक्तांच्या आदेशाने आतापर्यंत शहरातील ४८ गुंड टोळ्यांविरुद्ध मोक्का कारवाई करण्यात आली आहे.
कुडले आणि साथीदारांनी कोथरूड परिसरात लोकशाहीर अण्णाभाऊ साठे जयंतीनिमित्त आयोजित कार्यक्रमात तलवार उगारुन दहशत माजविल्याची घटना नुकतीच घडली होती. त्यानंतर पसार झालेल्या कुडले याला मावळातील पवनानगर भागातून पकडण्यात आले होते. कुडले याच्याविरुद्ध मोक्का कारवाई करण्याचा प्रस्ताव कोथरूड पोलीस ठाण्याचे वरिष्ठ हेमंत पाटील, उपनिरीक्षक बसवराज माळी यांनी तयार केला होता. त्यानुसार ओंकार उर्फ आबा शंकर कुडले (वय २८, रा. सागर काॅलनी, कोथरूड), अशोक उर्फ आशुतोष बाबासाहेब काजळकर (वय २५, रा. सुतारदरा, कोथरूड), अक्षय उर्फ बारक्या सुनील पवार (वय २७, रा. मातळवाडी फाटा, भूगाव), व्यंकटेश हरिदास अंकुशे (वय २७, रमाई चौक, रामनगर, वारजे), मयूर शंकर येनपूरे (वय २५, रा. मयूर काॅम्प्लेक्स, भूगाव), आकाश दीपक लोयरे (वय २३, रा. स्वप्नसिद्धी आंगण, भूगाव), ओंकार रघुनाथ साळवी (वय २४, रा.कोकरे चाळ, शास्त्रीनगर, कोथरूड), गणेश दत्तात्रय शिंदे (वय २८, रा. किकिंष्दानगर, कोथरूड) यांच्याविरुद्ध कारवाई करण्यात आली. सहायक पोलीस आयुक्त भीमराव टेळे तपास करत आहेत.
हेही वाचा – गृहिणींसाठी आनंदवार्ता, टोमॅटोचे दर घटले! कांदा, लसूणच्या दरात अल्पशी वाढ
दागिने हिसकावणाऱ्या चोरट्यांवर मोक्का कारवाई
महिलेचे दागिने हिसकावणाऱ्या चोरट्यांविरुद्ध पोलीस आयुक्तांनी मोक्का कारवाई करण्याचे आदेश दिले. ज्ञानेश्वर उर्फ माऊली भिकाजी चव्हाण (वय २२, रा. देवाची ऊरळी, सासवड रस्ता), गजानन दत्तराव बोराडे (वय ३०, रा. हिवरकर मळा, सासवड, ता. पुरंदर) अशी मोक्का कारवाई केलेल्यांची नावे आहेत. चव्हाण, बोराडे यांनी वानवडी भागात महिलांचे दागिने हिसकावण्याचे आठ गुन्हे केले होते. दोघांविरुद्ध मोक्का कारवाई करण्याचा प्रस्ताव वानवडीचे वरिष्ठ पोलीस निरीक्षक भाऊसाहेब पटारे यांनी तयार केला होता. या प्रस्तावास नुकतीच मंजुरी देण्यात आली.
