पुणे : शिवाजीनगर ते हिंजवडी मेट्रो मार्गिकेसाठी वापरण्यात येणारे लाेखंडी बांधकाम साहित्य चोरणाऱ्या टोळीला चतु:शृंगी पोलिसांनी गजाआड केले. मेट्रोचे बांधकाम साहित्य चोरी प्रकरणात आणखी काही चोरटे सामील असून त्यादृष्टीने पोलिसांकडून तपास करण्यात येत आहे. दीपक पांडुरंग इदवे (वय २८, रा. पिंपरी, मोरवाडी) असे अटक करण्यात आलेल्याचे नाव आहे. याबाबत दिनेश प्रधान (वय २२, रा. सोमेश्वरवाडी, पाषाण) याने चतु:शृंगी पोलीस ठाण्यात फिर्याद दिली आहे.
प्रधान हा मेट्रोमध्ये सुरक्षारक्षक आहे. शिवाजीनगर ते हिंजवडी मेट्रो मार्गिकेचे काम सुरू आहे. रिक्षातून इदवे आणि साथीदार आले. इदवे आणि साथीदारांनी बाणेर परिसरातून २०० किलो वजनाचे लोखंडी पाईप चोरुन नेण्याचा प्रयत्न केला. त्या वेळी प्रधानने सहकाऱ्यांच्या मदतीने इदवेला पकडले. त्याच्या बरोबर असलेली एक महिला आणि साथीदार पसार झाले. इदवेला पोलिसांच्या ताब्यात देण्यात आले. त्याच्या बरोबर असलेल्या साथीदारांचा शोध सुरू असल्याची माहिती पाेलिसांनी दिली. सहायक पोलीस फौजदार राहीगुडे तपास करत आहेत.
