“युक्रेनमध्ये सध्या जी परिस्थिती आहे. त्या परिस्थितीत आपले जे किव्हमध्ये मिशन सुरू आहे, ते प्रत्येकवेळी जेव्हा तिथली परिस्थिती बदलत आहे. त्या पार्श्वभूमीवर तिथे असलेल्या भारतीय नागरिकांसाठी अॅडव्हाझरी काढली जाते. काल आम्ही मागील जवळपास चार-पाच दिवसांपासून किव्ह येथे जे भारतीय विद्यार्थी होते त्यांना आम्ही अॅडव्हाझरीच्या माध्यमातून सल्ला दिला होता. किव्ह सोडणंच उचित ठरेल. युक्रेनच्या पश्चिम भागाकडे त्यांनी गेलं पाहिजे.” असं परराष्ट्र व्यवहार आणि संसदीय कार्य राज्यमंत्री व्ही. मुरलीधरन यांनी आज(बुधवार) पुण्यात आयोजित पत्रकार परिषदेत सांगितलं.
तसेच, “याचप्रकारे खार्कीव्ह येथील जी ताजी माहिती आम्हाला प्राप्त होत आहे, त्या आधारावर वेळोवेळी अॅडव्हायझरी दिली जाते. खार्कीव्ह, सूमी या पूर्व भागात अजूनही ७ हजार विद्यार्थी अडकलेले आहेत. खार्कीव्ह सोडण्यासाठी आता सूचना दिल्या आहेत. भारतीय विद्यार्थ्यांना सुरक्षित आणण्यासाठी आम्ही प्रयत्न करतोय, आम्ही विद्यार्थ्यांना आणायला उशीर केलाय हे म्हणणं योग्य नाही.कारण अशा परिस्थितीत मदत करायला नियोजन करावं लागतं.” असं देखील व्ही. मुरलीधरन यांनी यावेळी बोलून दाखवलं.
युक्रेनच्या खार्कीव्ह आणि अन्य युद्धग्रस्त शहरांतून भारतीय नागरिकांना सुखरूप मायदेशी आणण्याबाबत रशिया आणि युक्रेनच्या दूतावासाबरोबरच उभय देशांतील भारतीय दूतावासांशी संपर्कात आहेत. युद्धग्रस्त भागांतून भारतीयांना सुरक्षित बाहेर पडू देण्याबाबत २४ फेब्रुवारीपासून या दोन्ही देशांकडे वारंवार मागणी करण्यात आल्याचे परराष्ट्र मंत्रालयाने स्पष्ट केले.‘ऑपरेशन गंगा’अंतर्गत भारतीयांना सुखरूप मायदेशी आणण्यात समन्वय साधण्यासाठी केंद्रीय मंत्री हरदीप पुरी हे हंगेरी, ज्योतिरादित्य शिंदे हे रोमानिया, किरेन रिजीजू हे स्लोव्हाकीया आणि जनरल व्ही़ क़े सिंह यांना पोलंडमध्ये पाठविण्यात आले आहे.
