टाटा-एअर बस प्रकल्प गुजरातमध्ये जाण्यावरून भारतीय जनता पक्षावर टीका करणे म्हणजे महाविकास आघाडी सरकारने राज्याच्या जनतेशी केलेले पाप लपविण्याचा प्रकार आहे, अशी टीका भाजपचे शिवाजीनगर मतदारसंघाचे आमदार सिद्धार्थ शिरोळे यांनी केली. ठाकरे सरकारने महाराष्ट्राच्या औद्योगिक क्षेत्राचे वाटोळे करून आता उलटा कांगावा सुरू केला आहे, असा आरोपही त्यांनी केला.
हेही वाचा- पिंपरी : सहशहर अभियंत्यांना नव्या जबाबदाऱ्यांचे वाटप
पंतप्रधान नरेंद्र मोदी यांच्या संकल्पनेतील मेक इन इंडिया आणि आत्मनिर्भर भारत अभियानांतर्गत संपूर्ण देशांतर्गत विमान निर्मितीच्या या प्रकल्पासाठी ८ सप्टेंबर २०२१ रोजी एअर बस आणि स्पेस एसए स्पेन यांच्यातील कराराला मंत्रीमंडळ सुरक्षा समितीने मान्यता दिली आणि लगेच २४ सप्टेंबर २०२१ रोजी संरक्षण मंत्रालयासोबत सामंजस्य करार करण्यात आला. एअरबस आणि टाटा यांच्यातील करारानुसार संयुक्तपणे उभारण्यात येणाऱ्या या प्रकल्पास संरक्षण मंत्रालयाने हिरवा कंदील दाखविल्याचे रतन टाटा यांनी त्याच दिवशी जाहीरही केले होते.
हेही वाचा- रॅम्बो सर्कसचे संस्थापक पी. टी. दिलीप यांचे निधन
मात्र, असे असताना हा प्रकल्प महाराष्ट्रात आणण्यासाठी एकही पत्र तत्कालीन महाविकास आघाडी सरकारने पाठविले नाही वा कोणता पाठपुरावा केला नाही. या वस्तुस्थितीची माहिती असताना निव्वळ दिशाभूल करण्याचे राजकारण महाविकास आघाडीच्या नेत्यांनी करू नये. मुद्यांवर बोलायचे असल्यास टाटा एअरबसला लिहिलेले एकतरी पत्र त्यांनी जाहीर करावे, असे आव्हान शिरोळे यांनी केले आहे.
