पुणे : कसबा पोटनिवडणुकीत भाजपच्या उमेवाराला पाठिंबा देण्याची घोषणा मनसेने केल्यानंतर महाविकास आघाडीच्या उमेदवाराचे स्वागत पदाधिका-यांनी केल्यानंतर भाजपने मनसेची मनधरणी करण्याचा प्रयत्न सुरू केला आहे. राज्याचे सार्वजनिक बांधकाम राज्यमंत्री रवींद्र चव्हाण यांनी मनसेच्या प्रमुख नेत्यांच्या निवासस्थानी जाऊन शुक्रवारी भेटी घेतली. मनसेचा भाजपलाच पाठिंबा असल्याचे रवींद्र चव्हाण यांनी सांगितले.
हिंदुत्व आणि विकास हे दोन्ही मुद्दे प्रभावशाली पद्धतीने पुढे नेणारा भारतीय जनता पक्ष आहे. त्यामुळेच कसबा विधानसभा मतदारसंघात भारतीय जनता पक्षाला पूर्ण सक्रिय पाठिंबा देण्याचा निर्णय महाराष्ट्र नवनिर्माण सेनेचे घेतला असल्याचे मत प्रदेश सरचिटणीस अजय शिंदे यांनी व्यक्त केले.चव्हाण यांनी मनसे नेते दीपक पायगुडे, बाळा शेडगे, सुशिला नेटके, अजय शिंदे, प्रल्हाद गवळी यांच्या सह प्रमुख पदाधिकारी आणि कार्यकर्त्यांच्या भेटी घेतल्या.
चव्हाण म्हणाले, मनसे अध्यक्ष राज ठाकरे यांना मानणारा मोठा वर्ग आहे. विकास आणि हिंदुत्वाच्या मुद्द्यावर मनसे महायुतीच्या पाठीशी ठामपणे उभी राहिली आहे. मनसेच्या सर्व कार्यकर्त्यांमध्ये उत्साहाचे वातावरण आहे. राज ठाकरे दोन दिवसात पुण्यात येणार आहे, त्यांचे मार्गदर्शन आणि नियोजनाप्रमाणे काम अधिक गती घेईल. त्यामुळे कसबा मतदार संघातील महायुतीचे उमेदवार हेमंत रासने यांना मोठे बळ मिळाले असून विक्रमी मताधिक्याने विजय होईल असा विश्वास वाटतो.
