पुणे : विरुद्ध दिशेने येणाऱ्या मोटारचालकाने दुचाकीस्वाराला गजाने बेदम मारहाण केल्याची घटना गणेश पेठेत शुक्रवारी मध्यरात्री घडली. याप्रकरणी मोटारचालकासह साथीदारांविरुद्ध खडक पोलिसांनी गुन्हा दाखल केला.रणजित किशोर शिंदे (वय २८, रा. गंज पेठ) असे जखमी झालेल्या दुचाकीस्वाराचे नाव आहे. याप्रकरणी मोटारचालकासह त्याच्याबरोबर असलेल्या साथीदारांविरुद्ध गुन्हा दाखल करण्यात आला आहे. शिंदे यांनी खडक पोलीस ठाण्यात फिर्याद दिली आहे. पोलिसांनी दिलेल्या माहितीनुसार, शिंदे आणि त्यांची पत्नी रुग्णालयात गेले होते. शुक्रवारी मध्यरात्री साडेबाराच्या सुमारास शिंदे दाम्पत्य दुचाकीवरून गणेश पेठेतून निघाले होते. त्यावेळी मोटारचालक विरुद्ध दिशेने आला.
शिंदे दाम्पत्याने मोटारचालकाला तो विरुद्ध दिशेने माेटार चालवित असल्याचे सांगितले. मोटारचालक आणि साथीदारांनी शिंदे दाम्पत्याला शिवीगाळ केली. दुचाकीस्वार रणजित यांना शिवीगाळ करून मोटारचालक आणि त्याच्याबरोबर असलेल्या साथीदारांनी बेदम मारहाण केली. त्यांच्या डोक्यात कठीण वस्तू मारली. मारहाणीत शिंदे यांच्या डोक्याला गंभीर दुखापत झाली. पोलीस हवालदार पारखे तपास करत आहेत.शहरात वाहतूक नियमभंग करणाऱ्या वाहनचालकांविरुद्ध पोलिसांनी कारवाई सुरू केली आहे. विरुद्ध दिशेने येणाऱ्या वाहनचालकांविरुद्ध कारवाई करण्यात येत असून, गेल्या पाच महिन्यात विरुद्ध दिशेने येणाऱ्या ७० हजारांहून जास्त वाहनचालकांविरुद्ध कारवाई करण्यात आली अहे.
