गणेश यादव
पिंपरी : पावसाळ्यात शहरातील रस्त्यावर ८ हजार २२९ खड्डे पडले होते. त्यापैकी ७ हजार ८१२ खड्डे बुजविण्यात आल्याचा दावा स्थापत्य विभागाने केला आहे. ४१७ खड्डे बुजविण्याचे राहिले असून पावसाळा संपल्याने सर्व खड्डे पुन्हा नव्याने डांबराने भरण्यात येणार आहेत. यासाठी ३० नोव्हेंबरची मुदत देण्यात आली आहे.
पिंपरी-चिंचवड शहर आणि परिसरात पावसाला सुरुवात होण्यापूर्वी शहरात ६३३ खड्डे होते. पावसाळ्यात शहराच्या विविध भागांतील रस्त्यांवर आठ हजार २२९ खड्डे पडले होते. उपनगरांतील रस्त्यांवर खड्डेच खड्डे झाले होते. आतापर्यंत डांबर, कोल्डमिक्सने दोन हजार ७४९, बीबीएम म्हणजे खडीने १ हजार २३३, डब्ल्यूएमएमने दोन हजार ७३८ खड्डे, पेव्हिंग ब्लॉक बसवून ४०७ खड्डे भरण्यात आले. मुरूम, खडी आणि सिमेंट काँक्रिटने ६८५ असे सात हजार ८१२ खड्डे बुजविले असून, शहरात फक्त ४१७ खड्डे बुजवायचे बाकी असल्याचा दावा महापालिका प्रशासनाने केला आहे. परंतु, महापालिकेचा हा दावा फोल असून शहराच्या अनेक भागातील रस्त्यावर मोठमोठे खड्डे दिसून येतात.
आणखी वाचा-बसची आसन क्षमता ४० आणि वाहतूक तब्बल ८० प्रवाशांची; आरटीओच्या वायुवेग पथकाची खासगी बसवर कारवाई
| प्रभाग | एकूण खड्डे | बुजविलेले खड्डे | बाकी खड्डे |
| अ | ५८३ | ५४९ | ३४ |
| ब | १,४९४ | १,४३० | ६४ |
| क | १,१३९ | १०८८ | ५१ |
| ड | १,५५५ | १,४४६ | १०९ |
| इ | ३८२ | ३६६ | १६ |
| फ | ८०६ | ७८२ | २४ |
| ग | ५७८ | ५४८ | ३० |
| ह | ६७६ | ६४७ | २९ |
पावसाळ्यात रस्त्यावर खड्डे पडताच तत्काळ बुजविले जातात. आता पावसाळा संपला आहे. त्यामुळे सर्व खड्डे डांबराने बुजविण्यात येणार असून यासाठी सर्व क्षेत्रीय कार्यालयांना ३० नोव्हेंबरची मुदत दिली आहे. -मकरंद निकम, शहर अभियंता, पिंपरी-चिंचवड महापालिका
