सांगवडे येथे राजकीय वादातून एकाची निर्घृण हत्या

पोलिसांनी दिलेल्या माहिती नुसार, भैरवनाथ मंदिरात कीर्तन सुरु असताना, मंदिरा लगत रात्री सव्वा बाराच्या सुमारास ही हत्या करण्यात आली. हत्या करणारे ४ ते ५ अज्ञात फरार झाले असून तळेगाव दाभाडे पोलीस त्यांचा शोध घेत आहेत. नवनाथ लिम्हण यांच्यावर तलवारीने वार आणि लाकडी दांडक्याने मारहाण करण्यात आली. त्यांना तातडीने जवळच्या रुग्णालयात दाखल करण्यात आले. मात्र उपचारपूर्वीच त्यांचा मृत्यू झाला. पूर्व वैमनस्यातून ही हत्या झाल्याचा संशय असून याला राजकीय जोड असण्याची शक्यता आहे. तसेच नवनाथ अर्जुन लिम्हण हे भारतीय जनता पक्षाचे कार्यकर्ते असल्याची प्राथमिक माहिती समोर येत आहे.

हत्या झालेल्या नवनाथ यांची पत्नी ही सांगवडे गावच्या विद्यमान सरपंच आहेत. हत्या करणाऱ्या मुख्य आरोपीची पत्नी ही माजी सरपंच असल्याची पोलिसांनी माहिती दिली आहे. याप्रकरणी काही संशयित ताब्यात घेण्यात आले आहेत. तसेच तळेगाव दाभाडे पोलिसांत हत्येचा गुन्हा दाखल करण्यात आला असून पुढील तपास सुरु आहे.