स्थानिक स्वराज्य संस्था निवडणुकांच्या पहिल्या टप्प्यात यश मिळाल्यानंतर दुसऱ्या टप्प्यातील पुणे नगरपालिकेच्या निवडणुकीतही भाजपला चांगले यश मिळाले आहे. यापैकी पुणे जिल्ह्यातील पवार घराण्याचे वर्चस्व असलेल्या बारामती नगरपालिकेच्या लढतीकडे सर्वांचे लक्ष लागले होते. बारामतीचा गड राखण्यासाठी अजित पवार यांनी आपली संपूर्ण ताकद पणाला लावली होती. तर मुख्यमंत्री देवेंद्र फडणवीस यांच्यासह भाजपने पवार घराण्याच्या बालेकिल्ल्याला सुरूंग लावण्यासाठी आक्रमक प्रचार केला होता. मात्र, राष्ट्रवादी काँग्रेसने बारामती नगरपालिकेच्या ३९ पैकी ३५ जागांवर विजय मिळवत बारामती म्हणजे पवार हे समीकरण कायम असल्याचे सिद्ध केले. याशिवाय, राष्ट्रवादीने याठिकाणी नगराध्यक्षपद जिंकून पालिकेची सर्व सूत्रे आपल्याच हाती ठेवली आहेत. मुख्यमंत्र्यांनी बारामतीत जाहीर सभा घेऊन राष्ट्रवादीला पाणी पाजण्याची भाषा केली होती. मात्र, बारामतीतील पवारांच्या क्लीन स्वीपमुळे भाजपच्या अपेक्षांवर पुरते पाणी फेरले गेले आहे. अनेक ठिकाणी भाजपने स्थानिक आघाड्यांशी जुळवून घेतले होते. महादेव जानकर यांचा राष्ट्रीय समाज पक्ष, स्वाभिमानी संघटना, आरपीआयसह छोट्या पक्षांनी निवडणूक लढणाऱ्या भाजपला केवळ चार जागांवरच समाधान मानावे लागले. मात्र, दुसऱ्या बाजुला भाजपने पुणे जिल्ह्यातील अनेक पालिकांमध्ये मुसंडी मारली आहे. राष्ट्रवादी काँग्रेसचा बालेकिल्ला असलेल्या पुणे जिल्ह्यात मुख्यमंत्री देवेंद्र फडणवीस यांच्यासह भाजपच्या सर्वच नेत्यांनी आक्रमक प्रचार केला होता. भाजप नेते गिरीश बापट यांनी पुणे आणि लातूर नगरपालिकेच्या निवडणुकीत भाजपला सर्वाधिक मते मिळाल्याचा दावा केला आहे. याशिवाय, नगराध्यक्षपदांच्या शर्यतीतही भाजप नंबर वनचा पक्ष ठरला आहे.
राज्यातील स्थानिक स्वराज्य संस्थांच्या दुसऱ्या टप्प्यातील निवडणुकांचे निकाल आज जाहीर झाले. यामध्ये पुणे आणि लातूर जिल्ह्यातील नगरपालिका व नगरपंचायतींचा समावेश होता. पहिल्या टप्प्यातील विजयाची परंपरा कायम राखण्यासाठी भाजपने सारा जोर लावला होता. पुण्यातील जेजुरी, बारामती, तळेगाव, लोणावळा, दौंड, सासवड, शिरूर, आळंदी, इंदापूर, जुन्नर या नगरपालिकांसाठी मतदान झाले. पुणे जिल्ह्यातील ३२४ जागांवर १३२६ उमेदवार आपले भवितव्य आजमावत आहेत. जेजुरीत ८६.१४ टक्के मतदान झाले तर, तळेगाव ६८.२२, दौंड ६०.६१, सासवड ७५.१२, शिरूर ७३.४७, आळंदी ८२.३०, इंदापूर ७७.७२ तर जुन्नरमध्ये ७२.४३ टक्के मतदान झाले.
पहिल्या टप्प्यात झालेल्या नगरपालिकांच्या निवडणुकांमध्ये भाजपला चांगले यश मिळाले होते. तब्बल ३१ नगरपालिका जिंकून भाजपने आघाडी घेतली आहे. तर ५२ ठिकाणी भाजपचे थेट नगराध्यक्षही निवडून आले आहेत. भाजपपाठोपाठ २० नगरपालिका जिंकत काँग्रेसने दुसऱ्या क्रमांकावर झेप घेतली. काँग्रेसचेही २२ ठिकाणी थेट नगराध्यक्ष निवडून आले. तर राष्ट्रवादी १७ नगरपालिकांसह तिसऱ्या स्थानावर आहे. शिवसेना १६ नगरपालिकांसह शेवटच्या क्रमांकावर आहे. त्रिशंकू अवस्थेतील नगरपालिकांची संख्या तब्बल ३४ आहे.
