पुणे : पॉप्युलर फ्रंट ऑफ इंडियाच्या देशातील दहशतवादी कारवायांबाबत राष्ट्रीय तपास यंत्रणेने ( एनआयए ) न्यायालयात आरोपपत्र दाखल केले आहे. त्यात पुण्यातील एका शाळेच्या मालमत्तेवर टाच आणली असून, या इमारतीच्या चौथ्या आणि पाचव्या मजल्याचा वापर देशविरोधी कृत्यांसाठी केल्याचा ठपका ठेवण्यात आला आहे.
निरपराध मुस्लिम तरुणांना कट्टरतेचे धडे देऊन त्यांना दहशतवादी कारवायांकडे वळवले जात असल्याचा ठपका ठेवून पॉप्युलर फ्रंट ऑफ इंडिया संघटनेच्या देशभरातील कार्यालयांवर छापे टाकण्यात आले. त्याअंतर्गत कोंढव्यातील एका खासगी शाळेवर कारवाई करण्यात आली. या इमारतीमध्ये तरुणांना दहशतवादी कारवायांचे प्रशिक्षण दिले जात असल्याचा आरोप एनआयएने केला होता. या कारवाईच्या निषेधार्थ संघटनेकडून जिल्हाधिकारी कार्यालयावर मोर्चा काढण्यात आला. त्यामध्ये काही वादग्रस्त घोषणा दिल्या गेल्याचाही आरोप झाला होता. त्यावेळी बेकायदा मोर्चा काढल्याच्या प्रकरणी बंडगार्डन पोलीस ठाण्यात गुन्हा दाखल करण्यात आला आहे.
हेही वाचा >>> अजित पवार भाजपमध्ये जाण्याची चर्चा; शरद पवार बारामतीत कुस्तीचे डाव पाहण्यात मग्न
दरम्यान, देशभरात ‘एनआयए’ने केलेल्या कारवाईबाबत नुकतेच न्यायालयात आरोपपत्र दाखल करण्यात आले. त्यामध्ये रविवारी पुण्याच्या संबंधित शाळेच्या इमारतीवर टाच आणण्यात आली. या इमारतीच्या चौथ्या आणि पाचव्या मजल्याचा वापर संघटनेने देशविरोधी कृत्यांसाठी केल्याचा,तसेच, निष्पाप मुस्लिम तरुणांना या परिसरांमध्ये सशस्त्र प्रशिक्षण दिलेले जात असल्याचा ठपका ठेवण्यात आला आहे. या संदर्भात दिल्लीच्या विशेष न्यायालयात वीसजणांविरुद्ध आरोपपत्र दाखल करण्यात आले आहे, अशी माहिती ‘एनआयए’ने दिली.
