रस्ते खोदाईला १५ मेनंतर मनाई ; पिंपरी महापालिकेचा निर्णय, मुदतीनंतर रस्ते खोदल्यास फौजदारी कारवाई

पिंपरी-चिंचवड शहरात विविध सेवा वाहिन्यांच्या कामांसाठी वारंवार केले जाणारे खोदकाम आणि त्यानंतर केल्या जाणाऱ्या दुय्यम दर्जाच्या रस्ते दुरुस्तीमुळे शहरातून वाहन चालविणे अवघड होत आहे. त्यामुळे अपघात होतात. ते टाळण्यासाठी शहरातील मुख्य रस्ते आणि अतिवर्दळीच्या रस्त्यांवरील जलवाहिन्या, मलनिस्सारण वाहिन्या, पावसाळी गटारे, इंटरनेट आणि अन्य केबल, एमएनजीएल, तसेच वीजवाहिन्यांची कामे येत्या १५ मेपर्यंत पूर्ण करावीत, अशा सूचना महापालिकेने दिल्या आहेत. केवळ अत्यावश्यक बाब म्हणून काही कामांसाठी रस्तेखोदाईला परवानगी दिली जाणार असल्याचेही महापालिकेने स्पष्ट केले आहे.

‘रस्त्यांची दुरुस्ती आणि डांबरीकरणाची कामे पावसाळ्यापूर्वी करण्यात येणार आहेत. त्याबाबतच्या सूचना संबंधित अधिकाऱ्यांना देण्यात आल्या आहेत. पावसाळ्यात कोणत्याही कामासाठी रस्ते आणि पदपथ खोदकामास परवानगी दिली जाणार नाही. केवळ अत्यावश्यक आणि अतितातडीच्या कामांना अटी आणि नियम टाकून परवानगी दिली जाणार आहे. विनापरवाना खोदकाम केल्यास संबंधितांवर दंडात्मक कारवाई, तसेच, फौजदारी गुन्हा दाखल केला जाईल,’ असे पिंपरी-चिंचवड महापालिकेचे शहर अभियंता मकरंद निकम यांनी सांगितले.

शहरात १७८ खड्डे

मागील पावसाळ्यात शहराच्या विविध भागांतील अनेक रस्त्यांवर मोठी चाळण झाली होती. पावसाळ्याच्या कालावधीमध्ये सात हजार ४०५ खड्डे पडले हाेते. यांपैकी सात हजार २२७ खड्डे पूर्ण बुजविण्यात आले असून, त्यांचे डांबरीकरणही पूर्ण झाले आहे. मात्र, त्यानंतरही सद्य:स्थितीत शहरातील आठही क्षेत्रीय कार्यालय परिसरात १७८ खड्डे बुजविणे शिल्लक आहे. हे खड्डेही त्वरित बुजवून रस्त्यांचे डांबरीकरण करण्याचे आदेश स्थापत्य विभागाने दिले आहेत. येत्या १५ मेपर्यंत रस्तेखोदाईस परवानगी आहे. त्यानंतर रस्तेखोदाई केल्यास फौजदारी कारवाई करण्यात येणार आहे.- मकरंद निकम, शहर अभियंता, पिंपरी-चिंचवड महापालिका