दत्ता जाधव
पुणे : यंदा ऑगस्ट, सप्टेंबर पाठोपाठ ऑक्टोबर महिनाही सरासरीपेक्षा उष्ण राहण्याचा अंदाज हवामान विभागाने व्यक्त केला आहे. विदर्भात सर्वाधिक म्हणजे सरासरीपेक्षा २ ते ३ अंश सेल्सिअस जास्त तापमानाची नोंद झाली आहे.
हवामान विभागाने दिलेल्या माहितीनुसार, एक ऑक्टोबर ते अकरा ऑक्टोबर या काळात विदर्भासह ओदिशापासून दक्षिणेकडील संपूर्ण पूर्व किनारपट्टी, गुजरात, राजस्थान, पंजाब, हरियाना दिल्ली, उत्तर मध्य प्रदेश आणि पश्चिम उत्तर प्रदेशात कमाल तापमान ३५ अंश सेल्सिअसच्या पुढे गेले आहे. सरासरी ३३ ते ३४ अंश सेल्सिअस तापमान असणाऱ्या ठिकाणी पारा ३५ अंशांच्या पुढे गेला आहे. विदर्भात सरासरी तापमानापेक्षा २ ते ३ अंश सेल्सिअसची सर्वाधिक तापमान वाढ नोंद झाली आहे. तर मराठवाड्यात सरासरी कमाल तापमानापेक्षा १ ते २ अंश सेल्सिअसची वाढ झाली आहे.
आणखी वाचा-पिंपरी महापालिकेच्या शाळेतील विद्यार्थी तंत्रज्ञान सक्षम होणार; सात शाळांमध्ये ‘कोडिंग’ वर्ग
दरम्यान, तापमान वाढीचा हा कल पुढील दहा दिवस कायम राहण्याचा अंदाज व्यक्त करण्यात आला आहे. त्यामुळे ऑगस्ट, सप्टेबर महिन्यासारखाच ऑक्टोबर महिनाही सरासरीपेक्षा उष्ण ठरण्याची शक्यता आहे.
अकोल्यात ३७.५ अंश सेल्सिअसची नोंद
गुरुवारी अकोल्यात सर्वाधिक ३७.५ अंश सेल्सिअसची नोंद झाली आहे. अमरावती, ब्रह्मपुरी (चंद्रपूर) आणि वाशिमध्ये पारा ३६ अंशांवर गेला आहे. विदर्भातील अन्य ठिकाणांसह आणि मराठवाड्यात कमाल तापमान सरासरी ३५ अंश सेल्सिअसवर गेले आहे. मध्य महाराष्ट्रात पारा ३३ अंशांवर गेला होता. सांताक्रुज येथे ३४.७ अंश सेल्सिअसची नोंद झाली आहे.
