लोकसत्ता प्रतिनिधी
पुणे: शहरातील एका नामवंत उपाहारगृहाकडून एका थाळीवर ग्राहकांना एक थाळी मोफत देण्यात येणार असल्याची बतावणी करुन सायबर चोरट्यांनी एका महिलेला दोन लाख रुपयांचा गंडा घातल्याचा प्रकार उघडकीस आला आहे. या प्रकरणात गुन्हा दाखल करण्यात आलेले सायबर चोरटे मूळचे केरळचे असल्याचे तपासात निष्पन्न झाले आहे.
याबाबत त्या महिलेने खडक पोलीस ठाण्यात फिर्याद दिली आहे. तिने दिलेल्या फिर्यादीनुसार पोलिसांनी प्रकाश कुमार (रा. मुन्नार, केरळ) याच्यासह साथीदारांच्या विरुद्ध गुन्हा दाखल केला आहे. तक्रारदार महिला शुक्रवार पेठेत राहायला आहे. डेक्कन जिमखाना भागातील एका प्रसिद्ध उपाहारगृहाकडून एका थाळीवर ग्राहकांना दुसरी थाळी मोफत देण्यात येणार असल्याची फसवी जाहिरात समाजमाध्यमावर प्रसारित केली होती. महिलेच्या वडिलांनी जाहिरातीत दिलेल्या मोबाइल क्रमांकावर संपर्क साधला. चोरट्यांनी बँक खात्याची गोपनीय माहिती घेतली. बँक खात्यातून एक लाख ९९ हजार रुपये लांबविण्यात आले. फसवणूक झाल्याचे लक्षात आल्यानंतर महिलेने पोलिसांकडे तक्रार दिली. वरिष्ठ पोलीस निरीक्षक संगीता यादव तपास करत आहेत.
