कसबा आणि चिंचवड या पोटनिवडणुकीसाठी रविवारी (२६ फेब्रुवारी) मतदान होणार आहे. निवडणुकीत उद्योग, ऊर्जा व कामगार विभागांतर्गत येणाऱ्या सर्व उद्योग समूह, महामंडळे, कंपन्या व संस्थांमध्ये, औद्योगिक उपक्रम किंवा इतर आस्थापनांमध्ये काम करणारे कामगार,अधिकारी, कर्मचारी यांना मतदान करता यावे, यासाठी २६ फेब्रुवारीला भरपगारी सुट्टी किंवा दोन तासांची सवलत देण्याबाबत परिपत्रक शासनाने प्रसृत केले आहे.
हेही वाचा- पदवी प्रवेशासाठी सीयूईटी, सीयूईटीचे गुण स्वीकारा; यूजीसीचे उच्च शिक्षण संस्थांना आवाहन
लोकप्रतिनिधित्व कायदा, १९५१ मधील कलम १३५ (ब) नुसार मतदानाच्या दिवशी मतदारांना त्यांचा मतदानाचा हक्क बजावण्यासाठी भरपगारी सुटी देण्यात येते किंवा काही ठिकाणी कामाच्या तासात सवलत देण्यात येते. मात्र गेल्या काही निवडणुकांमध्ये कर्मचाऱ्यांना संस्था / आस्थापना भरपगारी सुटी किंवा सवलत देत नसल्याचे निदर्शनास आले आहे. या पार्श्वभूमीवर हे परिपत्रक प्रसृत करण्यात आले आहे.
दरम्यान, निवडणूक होणाऱ्या मतदान क्षेत्रात मतदार असलेले कामगार, अधिकारी, कर्मचाऱ्यांना, मग ते कामानिमित्त निवडणूक होणाऱ्या क्षेत्राबाहेर कार्यरत असले,तरीही त्यांना निवडणुकीच्या दिवशी मतदानाचा हक्क बजावण्यासाठी भरपगारी सुटी देण्यात यावी. अपवादात्मक परिस्थितीत कामगार, अधिकारी, कर्मचाऱ्यांना पूर्ण दिवस सुटी देणे शक्य नसेल,तर मतदान क्षेत्रातील कामगारांना मतदानाचा हक्क बजावण्यासाठी कमीत कमी दोन तासांची सवलत देता येईल. मात्र, त्याबाबत जिल्हाधिकारी तथा जिल्हा निवडणूक अधिकारी यांची पूर्वपरवानगी घेणे आवश्यक आहे. कोणत्याही परिस्थितीत मतदारांना मतदानासाठी किमान दोन तासांची सवलत मिळेल याची दक्षता संबंधित आस्थापनांनी घेणे आवश्यक राहील. याबाबत तक्रार आल्यास संबंधितांविरुद्ध योग्य कारवाई करण्यात येईल, असेही परिपत्रकात नमूद करण्यात आले आहे.
