Pahalgam Attack : “दहशतवाद आम्ही अनुभवलाय, राजकारण्यांनी आमच्या भावनांशी… “, संतोष जगदाळेंच्या पत्नीची विनंती

संतोष जगदाळेंच्या पत्नी काय म्हणाल्या?

“मी अजूनही त्या धक्क्यातच आहे. डोळे बंद केले तरीही रायफल घेतलेला माणूसच दिसतो. मागच्या आठ दिवसात मी झोपलेच नाहीये. लोकांनी आम्हाला पाठिंबा दर्शवला आहे. रविवार होता की सोमवार हेदेखील कळत नाही. आम्ही अजूनही मनाने पहलगामला आहोत. मी त्या धक्क्यातून सावरु शकलेले नाही. आमचा जो लॉस झाला आहे तो कुणीही भरुन काढू शकत नाही. मला ते शब्दांत मांडता येणार नाही. मला भयंकर भीती वाटते. मी अडीच वाजता उठून बसले मला वाटलं की कुणीतरी रायफल घेऊन फिरतं आहे. मी घाबरुन बाहेर आले, मला खूप भीती वाटते असं संतोष जगदाळेंच्या पत्नी म्हणाल्या.

आमच्या भावनांशी खेळू नका-संतोष जगदाळेंच्या पत्नीची विनंती

“माझी एक विनंती आहे सगळ्यांनाच की आमच्या या सगळ्या भावनांचा पॉलिटिकल इश्यू करु नका. आमच्या भावनांशी खेळू नका. आम्ही तो अनुभव घेतला आहे. आमचं दुःख रंगवून सांगू नका. आमचा माणूस आमच्या समोर बोलून मारला आहे. आम्ही सगळं सांगितलं आहे. ते (दहशतवादी) निवांत मारायलाच आले होते. दहशतवाद हा शब्द आम्ही अनुभवला आहे, जगला आहे. त्यांनी त्वेषाने बोललली वाक्यं ऐकली आहेत. माझे मिस्टर आणि माझे दीर माझ्या डोळ्यांसमोर पडलेले दिसतात. त्यांचे मेंदू बाहेर आले होते तो प्रसंग माझ्या समोरुन गेलेला नाही. आम्ही भयंकर स्थितीला सामोरं गेलो आहोत. माणुसकी बाळगा आणि सगळ्या राजकारण्यांना हे सांगते आहे की आमच्या भावनांशी खेळू नका. आम्ही कुठल्या मानसिकतेतून जात आहोत याचा माणुसकी म्हणून विचार करा. कुणीही स्टेटमेंट करणं सोपं आहे. कुणी आम्हाला खोटं पाडू नका. लहान मुलांनीही तेच सांगितलं आहे. आमच्या मनाशी खेळू नका. आपल्या राज्यातले राजकारणी आहेत, त्यांना आपलं मानतो त्यांनी असं करु नये.” असंही संतोष जगदाळेंच्या पत्नी म्हणाल्या. एबीपी माझा या वाहिनीशी त्यांनी संवाद साधला आहे. त्यावेळी त्यांनी ही विनंती केली.