प्रवाशाने पीएमपी वाहकाच्या अंगठ्याच्या चावा घेतल्याची घटना हडपसर भागातील गाडीतळ स्थानकात घडली. या प्रकरणी प्रवाशाला अटक करण्यात आली. शिवराज साळुंखे (वय ३०, रा. हरपळे वस्ती, फुरसुंगी) असे अटक करण्यात आलेल्या प्रवाशाचे नाव आहे. याबाबत पीएमपी वाहक मारुती बाळू सांगळे (वय ३९, रा. नायगाव रस्ता, कुंजीरवाडी, ता. हवेली) यांनी हडपसर पोलीस ठाण्यात फिर्याद दिली आहे.
एनडीए ते हडपसर या मार्गावरील बस हडपसर येथील गाडीतळ स्थानकात थांबली. त्या वेळी आरोपी साळुंकेने बसमध्ये प्रवेश करायचा प्रयत्न केला. त्या वेळी सांगळे यांनी बस मार्गस्थ व्हायची आहे, असे साळुंखे याला सांगितले. तेव्हा साळुंखे पीएमपी वाहक सांगळे यांच्यावर चिडला. मी पूर्वी पीएमपीमध्ये चालक होतो. तू मला शिकवू नको, असे साळुंखेने सांगितले. साळुंखेने सांगळे यांना शिवीगाळ करुन अंगठ्याचा चावा घेतला. त्यानंतर साळुंखेला पकडून पोलिसांच्या ताब्यात देण्यात आले. पोलीस उपनिरीक्षक सोनटक्के तपास करत आहेत.
