‘डेक्कन क्वीन’, ‘इंद्रायणी एक्स्प्रेस’च्या प्रवासादरम्यान रेल्वेकडून प्रवाशांसाठी माहिती-मनोरंजनाचा खजिना

मध्य रेल्वेकडून खासगी संस्थेच्या सहभागातून हा उपक्रम राबविण्यात येत असून, पुणे-मुंबई मार्गावर प्रथमच त्याची सुरुवात करण्यात येणार आहे. डेक्कन क्वीन आणि इंद्रायणी एक्स्प्रेससह आणखी दहा गाड्यांमध्ये त्याचे नियोजन करण्यात आले आहे. उपक्रमात सहभागी होण्याच्या दृष्टीने गाड्यांमध्ये क्यूआर कोड असतील. मोबाइलच्या माध्यमातून हा कोड स्कॅन केल्यानंतर प्रवाशासाठी माहिती-मनोरंजनासह संवादाचा खजिना खुला होणार आहे. एका प्रवाशाला एकदाच कोड स्कॅन करावा लागणार आहे. त्यानंतर प्रवाशाच्या मोबाइलवर हव्या त्या वेळेला ही सुविधा उपलब्ध होऊ शकणार आहे.

संकेतस्थळाप्रमाणे असलेल्या या सुविधेत प्रवाशांनी विचारलेल्या प्रश्नानुसार माहिती किंवा मनोरंजनाचा ठेवा पुरविण्याची व्यवस्था आहे. विशेष म्हणजे रामायण-महाभारतासारख्या पौराणिक कथा आणि लोककथाही त्यात उपलब्ध होणार आहेत. आपण जात असलेल्या शहरातील वैशिष्ट्ये, तेथील पर्यटनाची ठिकाणे, खरेदी किंवा चांगल्या भोजनाची ठिकाणेही कळू शकणार आहेत. खेळाची आवड असणाऱ्यांसाठी विविध खेळ किवा सामान्य ज्ञानाच्या माहितीची खजिनाही प्रवाशांना मिळू शकणार आहे. त्याचप्रमाणे आपण करीत असलेल्या प्रवासाची माहिती, प्रवासादरम्यान येणारी स्थानके, महत्त्वाच्या शहरांतील वैशिष्ट्यांबाबतही प्रवाशांना माहिती मिळू शकणार आहे.