पिंपरी : शहराचा विस्तार वाढत असल्याने महापालिकेच्या वतीने पिंपरीतील गांधीनगरसमोरील महिंद्रा कंपनीच्या जागेत मध्यवर्ती अग्निशमन मुख्यालय उभारण्यात येणार आहे. त्यात आठ मजली प्रबोधिनी इमारत, १५ मजली निवासी इमारत, २२ अग्निशमन बंब बसतील असे वाहनतळ, अग्निशमन कार्यालय व कार्यशाळा, संग्रहालय व प्रेक्षागृह असणार आहे. यासाठी १२६ कोटी २४ लाख ३० हजार २७३ रुपये खर्च करण्यात येणार असून, कामाची ३० महिने मुदत आहे.
अग्निशमन विभागाचे मध्यवर्ती मुख्यालय सद्यस्थितीत संत तुकारामनगर येथे आहे. तेथील जागा अपुरी पडत असल्याने नव्या प्रशस्त ठिकाणी मुख्यालय बांधण्याचे नियोजन होते. गांधीनगर येथील महिंद्रा कंपनीकडून ‘आयटूआर’ अंतर्गत मिळालेल्या ५.५ एकर जागेत हे मुख्यालय बांधण्यात येणार आहे. त्या जागेत आठमजली प्रबोधिनी इमारत उभारली जाणार आहे. तिथे फायरमन व कर्मचाऱ्यांना प्रशिक्षण देण्यात येणार आहे. तर, अग्निशमन विभागात काम करणारे फायरमन, जवान, चालक व इतर कर्मचारी यांच्यासाठी १५ मजली निवासी इमारत बांधण्यात येणार आहे.
२२ अग्निशमन बंब उभे करता येतील, असे प्रशस्त वाहनतळ असणार आहे. तसेच, अग्निशमन कार्यालय व कार्यशाळा असणार आहे. अग्निशमन संग्रहालय, दोनशे जणांच्या आसन क्षमतेचे प्रेक्षागृह, ५० आसन क्षमतेची सेमिनार खोली, १०० प्रशिक्षणार्थी व ११८ अधिकारी व कर्मचाऱ्यांच्या निवासाची व्यवस्था असणार आहे. तसेच, कवायत करण्यासाठी मैदान असणार आहे. इतर वाहनांसाठी दोन मजली वाहन व्यवस्था असल्याचे स्थापत्य प्रकल्प विभागाचे मुख्य अभियंता प्रमोद ओंभासे यांनी सांगितले.
या प्रकल्पासाठी स्थापत्य प्रकल्प विभागाने १५० कोटी ९१ लाख ८२ हजार १७५ रुपये खर्चाची निविदा काढली होती. त्यात ११ ठेकेदारांनी सहभाग घेतला. त्यापैकी आठ ठेकेदार पात्र ठरले. त्यातील बी. जी. शिर्के कन्स्ट्रक्शन टेक्नॉलॉजी प्रा. लि.ची १२६ कोटी २४ लाख ३० हजार खर्चाची निविदा स्वीकृत करण्यात आली आहे. १६.४० टक्के कमी दराची निविदा असल्याने शिर्के कन्स्ट्रक्शनकडून १३ कोटी ३० लाख रुपये अतिरिक्त सुरक्षा अनामत रक्कम जमा करून घेण्यात आले आहेत. शहराची लोकसंख्या झपाट्याने वाढत आहे. शहरासाठी मध्यवर्ती अग्निशमन मुख्यालयाची गरज होती. त्या दृष्टीने सर्व सुविधांयुक्त मुख्यालय उभारण्यात येणार आहे. मुख्यालयाद्वारे शहर परिसरातील अग्निशमन सेवेची कार्यक्षमता व प्रशिक्षणाचा दर्जा उंचावणार असल्याचे अतिरिक्त आयुक्त प्रदीप जांभळे यांनी सांगितले.
