लोकसत्ता प्रतिनिधी
पुणे: अंदमान -निकोबार येथे सहलीचे आयोजन करण्यात येणार असल्याच्या आमिषाने १५ पर्यटकांची फसवणूक केल्या प्रकरणी एका पर्यटन कंपनीच्या संचालकांच्या विरुद्ध मार्केट यार्ड पोलिसांनी गुन्हा दाखल केला.
याबाबत हर्षल संभाजी शिंदे (वय ३२, रा. वास्तूनगर, सोसायटी, मार्केटयार्ड) यांनी मार्केट यार्ड पोलीस ठाण्यात फिर्याद दिली आहे. या प्रकरणी पर्यटन कंपनीचे संचालक सत्यकी मैती याच्या विरुद्ध गु्न्हा दाखल करण्यात आला आहे. शिंदे, त्यांचे मित्र यांच्यासह १५ जणांना अंदमान-निकोबार येथे जायचे होते.
आणखी वाचा- पुणे: खासगी प्रवासी बसमधील महिलांचा ऐवज चोरणारे गजाआड
पर्यटन कंपनीचे संचालक मैतीने सहलीचे आयोजन करण्यात येणार असल्याचे आमिष दाखवून शिंदे यांच्यासह १५ जणांकडून आगाऊ स्वरुपात एक लाख ६० हजार रुपये घेतले होते. त्यानंतर पर्यटन कंपनीकडून सहल काढण्यात आली नाही. शिंदे यांच्यासह १५ पर्यटकांनी मैतीकडे विचारणा केली. त्यांचे पैसेही परत करण्यात आले नाहीत. फसवणूक झाल्याचे लक्षात आल्यानंतर शिंदे यांनी पोलिसांकडे तक्रार दिली. गुन्हे शाखेच्या पोलीस निरीक्षक सविता ढमढेरे तपास करत आहेत.
