पिंपरी : रात्री अपरात्री फटाक्यासारख्या आवाज काढणाऱ्या बुलेटचालकांविरुद्ध पिंपरी-चिंचवड पोलिसांनी कारवाईचा बडगा उगारला आहे. बुलेटला बसविण्यात आलेले सायलेन्सर पाेलिसांनी जप्त केले. डांबरीकरणासाठी वापरला जाणारा रोड रोलर सायलेन्सरवर चालवून नष्ट करण्यात आले. पोलिसांनी या कारवाईत ५४२ सायलेन्सर नष्ट केले.
पिंपरी-चिंचवड पोलीस आयुक्‍तालयांतर्गत वाहनामध्ये अनाधिकृत हस्तक्षेप करून विशेषतः बुलेट मोटारसायकलचे सायलेन्सर बदलून कर्णकर्कश आवाज करणारे वाहन चालकांवर कारवाई करण्यात आली. पिंपरी-चिंचवड वाहतुक शाखे अंतर्गत वाहतुक विभागांकडून नियमितपणे कारवाई करण्यात येते. एक जानेवारी ते दहा एप्रिल २०२५ रोजी पर्यंत अनधिकृतपणे वाहनामध्ये हस्तक्षेप करणाऱ्या वाहन चालकांवर एकूण चार हजार ८५३ जणांवर गुन्हे दाखल केले आहेत. त्यांच्यावर ४८ लाख ४९ हजार रुपये एवढी दंडात्मक कारवाई करण्यात आलेली आहे. पोलीस मुख्यालयाचे मैदानावर निगडी वाहतूक विभागाचे पोलीस निरीक्षक विश्वजीत खुळे यांच्या उपस्थितीत जमा असलेले ५४२ सायलेन्सरवर रोड रोलर फिरवून विल्हेवाट लावण्यात आली आहे.
गेल्या काही दिवसांपासून शहर, परिसरात भरधाव वेगाने बुलेट चालवून सायलेन्सरमधून फटाक्यासारखे आवाज काढण्यात येत असल्याचे प्रकार वाढीस लागले आहेत. रात्री अपरात्री शहर,तसेच उपनगरात भरधाव वेगाने बुलेटचालक तरूण जातात. बूलेटच्या सायलेन्सरमध्ये फेरफार (माॅडिफाय) करण्यात आल्याने त्यातून फटाक्यासारखा आवाज निघतो. फटाक्यासारखा आवाज सायलेन्सरमधून निघत असल्याने त्याचा त्रास नागरिकांना विशेषत : ज्येष्ठांना होत असल्याच्या तक्रारी करण्यात आल्या होत्या. त्या पार्श्वभूमीवर पिंपरी-चिंचवड पोलिसांनी धडक कारवाई सुरू केली आहे. एक जानेवारी ते दहा एप्रिल २०२५ रोजी पर्यंत अनधिकृतपणे वाहनामध्ये हस्तक्षेप करणाऱ्या वाहन चालकांवर एकूण चार हजार ८५३ जणांवर गुन्हे दाखल केले आहेत. ही कारवाई यापुढेही सुरु राहणार असल्याचे पोलिसांनी सांगितले.