पिंपरी-चिंचवड : पोलिसांच्या कार्याला सलाम; रुटमार्च दरम्यान नागरिकांनी केला सन्मान

पिंपरी-चिंचवड पोलीस आयुक्तालयाच्या सांगवी पोलीस ठाण्यातील कर्मचारी आणि अधिकारी यांनी रूट मार्च काढला होता. गेल्या काही दिवसांपासून शहरातील पिंपळे गुरव परिसरात काही करोनाबाधित रुग्ण आढळले आहेत. त्यामुळे येथील परिसर सील करण्यात आला आहे.

याच पार्श्वभूमीवर नागरिकांनी बाहेर पडू नये म्हणून आज रूट मार्चचं आयोजन करण्यात आलं होतं. यावेळी वरिष्ठ पोलीस निरीक्षक ज्ञानेश्वर साबळे आणि इतर कर्मचारी यात सहभागी झाले होते. पोलिसांनी साठफुटी रोड येथून रूट मार्चला सुरुवात केली. विविध गल्ल्यांमधून मार्ग काढत असताना प्रत्येक ठिकाणी नागरिक टाळ्या, शंखनाद करून पोलिसांना प्रोत्साहन देत होते. काही ठिकाणी तर पारंपारिक पद्धतीनं टॉवेल टोपी आणि श्रीफळ देऊन त्यांचा सत्कार करण्यात आला.