पिंपरी : सहाशे रुपयांची लाच घेताना संगणक चालक महिला अटकेत

पाणी मीटर निरीक्षक विकास सोमा गव्हाणे व कंत्राटी संगणक चालक आशा कानिफनाथ चौपाली यांच्यावर दापोडी पोलीस ठाण्यात गुन्हा दाखल झाला आहे. चौपाली हिला अटक केली असून गव्हाणे पसार आहे. यातील तक्रारदार यांचे पाणीपट्टी देयक सरासरी काढले जात होते. ते नियमितपणे म्हणजे जितका वापर होईल तितके देयक काढण्यासाठी गव्हाणे याने स्वत:साठी एक हजार, तर चौपाली यांच्यासाठी सहाशे रुपयांची तक्रारदार यांच्याकडे मागणी केली. तक्रारदाराने याबाबत लाचलुचपत प्रतिबंधक विभागाच्या पथकाकडे तक्रार केली. त्यानुसार, ‘एसीबी’च्या पथकाने तक्रारीची पडताळणी करून सापळा रचला.

हेही वाचा – ‘रोबोटिक बॅरिएट्रिक’ शस्त्रक्रियेद्वारे लठ्ठपणाला कात्री! अधिक अचूकपणे, कमी वेळेत होणाऱ्या प्रक्रियेविषयी जाणून घ्या…

हेही वाचा – कार्यालयीन जागा सहकार्यात पुण्याचा झेंडा! मुंबई, दिल्लीला मागे टाकत देशात दुसऱ्या स्थानी झेप

चौपाली हिने तक्रारदार यांच्या पाणीपुरवठ्याचे देयक नियमित करून देण्यासाठी स्वत:साठी सहाशे रुपये तर गव्हाणे यांच्यासाठी एक हजार रुपये अशी एकूण १६०० रुपयांची मागणी केली. ही रक्कम स्वीकारताना चौपाली हिला पथकाने पकडले. चौपाली हिने गव्हाणे यांना त्यांच्यासाठी तक्रारदाराकडून स्वीकारलेल्या लाच रकमेबाबत दूरध्वनीवरून विचारले असता गव्हाणे याने त्यांच्यासाठी स्वीकारलेली रक्कम चौपाली यांच्याकडे ठेवण्यास सांगितल्याचे निष्पन्न झाले.