पिंपरी : ज्ञानोबा-तुकारामाच्या अखंड जयघोषात संतश्रेष्ठ तुकाराम महाराज यांचा पालखी सोहळा निगडीतील भक्ती-शक्ती चौकात दाखल होतच वातावरण भक्तीमय झाले. विठुरायाच्या भक्तीत तल्लीन होऊन नाचणाऱ्या भाविकांसोबत पिंपरी महापालिकेचे आयुक्त शेखर सिंह, अतिरिक्त आयुक्त जितेंद्र वाघ, प्रदीप जांभळे, उल्हास जगताप ‘ज्ञानोबा-माऊली-तुकाराम’ च्या जयघोषात दंग झाले.
लाखो वारकऱ्यांच्या उपस्थितीत सायंकाळी साडे पाच वाजता तुकोबांची पालखी पिंपरी-चिंचवड शहरात दाखल झाली. पालखी सोहळ्यामुळे सर्व परिसर भक्तिमय झाला. विठुरायाच्या भक्तीत तल्लीन होऊन नाचणाऱ्या भाविकांना पाहून महापालिकेचे आयुक्त, अधिकारीही त्यात उत्साहाने सहभागी झाले. आयुक्त शेखर सिंह यांच्यासह अतिरिक्त आयुक्त जितेंद्र वाघ, प्रदीप जांभळे, उल्हास जगताप, आरोग्य वैद्यकीय अधिकारी डॉ. लक्ष्मण गोफणे यांनीही या सोहळ्यात सहभागी होत ‘ज्ञानोबा-माऊली-तुकाराम’ च्या जयघोषावर ठेका धरला.