दिवाळीतील टिकल्या वाजविण्याच्या पिस्तुलाचा धाक, बाह्यवळण मार्गावर दहशत माजविणारे दोघे जण ताब्यात

अक्षय अंकुश गायकवाड (वय २७, रा. स्नेह विहार सोसायटी, दांगट पाटील नगर, शिवणे, एनडीए रस्ता), सुनील चंद्रकांत शिंदे (वय २८, रा. रामनगर, वारजे) अशी ताब्यात घेण्यात आलेल्यांची नावे आहे. त्यांच्याविरुद्ध सिंहगड रस्ता पोलीस ठाण्यात गुन्हा दाखल करण्यात आला असून, पोलीस उपनिरीक्षक अक्षय पाटील यांनी फिर्याद दिली आहे. बाह्यवळण मार्गावरील वडगाव ते वारजे पूल भागातून गुरुवारी (३१ ऑक्टोबर) दोघे जण दुचाकीवरुन निघाले होते. दुचाकीवरील सहप्रवासी तरुणाने त्याच्याकडील पिस्तूल दाखवून दहशत माजविण्याचा प्रकार केला होता. याबाबतची चित्रफीत समाज माध्यमात प्रसारित झाली होती. पिस्तुलाचा धाक दाखवून सहप्रवासी तरुण वाहनचालकांना शिवीगाळ करत असल्याचे चित्रफित दिसून आले होते.

हेही वाचा – आरटीई, राज्य अभ्यासक्रम आराखड्यातील अध्यापन तासांमध्ये विसंगती… झाले काय, होणार काय?

हेही वाचा – शहरभर फटाक्यांची तुफान आतषबाजी… हवेची गुणवत्ता खालावली…

संबंधित चित्रफीत प्रसारित झाल्यानंतर सिंहगड रस्ता पोलिसांनी दुचाकीवरील दोघांचा शोध घेतला. पोलिसांनी गायकवाड आणि शिंदे यांना ताब्यात घेतले. चौकशीत दोघांनी धमकाविण्यासाठी वापरलेले पिस्तूल दिवाळीतील टिकल्या वाजविण्याचे असल्याचे उघड झाले. दिवाळीतील टिकल्या वाजविण्याचे पिस्तूल दोघांनी बाळगले होते. खोटे पिस्तूल बाळगून दहशत माजविल्याप्रकरणी त्यांच्याविरुद्ध गुन्हा दाखल करण्यात अलाा, असे सिंहगड रस्ता पोलीस ठाण्याचे वरिष्ठ पोलीस निरीक्षक राघवेंद्रसिंह क्षीरसागर यांनी सांगितले.