पुणे: निवृत्त पोलीस निरीक्षक वजीर शेख यांच्या डोक्यात दगड घालून खुनाचा प्रयत्न केल्याप्रकरणी वानवडी पोलिसांनी एकाला अटक केली. प्राथमिक तपासात उपहारगृहाच्या जागेचा वादातून शेख यांच्यावर हल्ला करण्यात आल्याचे उघडकीस आले आहे.
या प्रकरणी प्रमोद काकडे (वय ४५, रा. वानवडी बाजार) याला अटक करण्यात आली आहे. या बाबत इशा वजीर शेख (वय ५६, रा. ब्रम्हा आंगण सोसायटी, वानवडी) यांनी वानवडी पोलीस ठाण्यात फिर्याद दिली आहे. वजीर शेख यांनी वानवडीतील संविधान चौकात नेचर ग्रो टुरिझम हाॅटेल सुरू केले आहे. त्यांनी दहा वर्षाच्या भाडेकराराने जागा घेतली आहे. काकडे याची तेथे जागा होती. काकडेकडे त्यांनी भाडेकराबाबत विचारणा केली होती. काकडे भाडेकरार न करता शेख यांच्याकडून कायम पैसे घ्यायचा. त्याला दारू पिण्याचे व्यसन आहे.
शुक्रवारी रात्री शेख आणि काकडे चर्चा करत होते. काकडेने वाद घालण्यास सुरुवात केली. तेथे पडलेला दगड उचलून त्याने शेख यांच्यावर हल्ला केला. शेख यांच्या चेहऱ्यावर दगड मारण्यात आला. त्यांचा चेहरा दगडाने ठेचण्याचा प्रयत्न केला. काकडेने केलेल्या हल्ल्यात शेख गंभीर जखमी झाले. शेख यांना तातडीने रुग्णालयात दाखल करण्यात आले. खुनाचा प्रयत्न केल्याप्रकरणी काकडेला अटक करण्यात आली आहे, असे वानवडी पोलीस ठाण्याचे वरिष्ठ पोलीस निरीक्षक संजय पतंगे यांनी सांगितले.
