तपासात मदत करण्यासाठी नऊ हजारांची लाच; बारामतीतील पोलीस हवालदार गजाआड

प्रदीप दत्तात्रय काळे (वय ४४) असे लाचखोर पोलीस हवालदाराचे नाव आहे. याबाबत एका तरुणाने लाचलुचपत प्रतिबंधक विभागाकडे तक्रार दिली होती. तक्रारदार तरुणाविरुद्ध बारामती तालुका पोलीस ठाण्यात गुन्हा दाखल करण्यात आला होता. संबंधित गुन्ह्यात न्यायालयाने तरुणाला बारामती पोलीस ठाण्यात हजेरी लावण्याचे आदेश दिले होते. हजेरीची नोंद करणे तसेच दाखल गुन्ह्याच्या तपासात मदत करण्यासाठी बारामती तालुका पोलीस ठाण्यातील हवालदार प्रदीप काळे यांनी तक्रारदार तरुणाकडे नऊ हजारांची लाच मागितली होती. त्यानंतर तक्रारदार तरुणाने लाचलुचपत प्रतिबंधक विभागाकडे तक्रार नोंदविली. लाचलुचपत प्रतिबंधक विभागाने तक्रारीची पडताळणी केली. तेव्हा काळे यांनी लाच मागितल्याचे उघड झाले.

हेही वाचा – धायरी येथे अल्पवयीन मुलावर भटक्या कुत्र्यांचा हल्ला;सायकलचे हँडल पोटात घुसून आतडे बाहेर

हेही वाचा – चिंचवडमध्ये महावितरणचा आकडेबहाद्दरांना दणका; चौदाशे वीजचोऱ्या उघड

काळे यांच्या विरुद्ध गुन्हा दाखल करून त्यांना अटक करण्यात आली. पोलीस अधीक्षक अमोल तांबे, अतिरिक्त अधीक्षक सूरज गुरव यांच्या मार्गदर्शनाखाली ही कारवाई करण्यात आली. पाेलीस निरीक्षक विरनाथ माने तपास करत आहेत.